Një denoncimi i fortë vjen nga ish-deputeti i Partisë Demokratike Igli Cara. Sipas tij, punonjësit e administratës së Durrësit detyrohen që të shpërndajnë postimet e kryebashkiakes Emiriana Sako ose të kryeministrit Edi Rama. Ndër të tjera, Cara publikoi një mesazh që u është dërguar punonjësve, ku i kërkohet kjo gjë. Sipas Carës, në rast se ata nuk e bëjnë, rrezikojnë vendin e punës. Gjithashtu, atyre u është kërkuar që të shkarkojnë një aplikacion i cili mbikqyret nga kryebashkiakia e Durrësit.
Postimi i Plotë:
Presioni në rritje, që nuk njeh as ligj dhe as limit është përballja e përditshme e punonjësve të administratës në Durrës e më gjerë. Shpërndarja e çdo postimi të kryetares së bashkisë dhe të vetë Ramës, në faqet personale në rrjetet sociale është një nga kushtet kryesore, për të mos humbur vendin e punës. Një cënim i hapur i privatësisë dhe i të drejtave të njeriut, pa lënë mënjanë kornizën ligjore. Ndërsa, qershia mbi tortë është “këshilla” për t’u regjistruar në programin “Aktivist”, i cili është shpërndarë dhe mbikëqyret me kujdes të veçantë nga Kryebashkiakja dhe stafi i saj. Në vend të jenë në shërbim të qytetarëve, punonjësit e administratës janë shndërruar në shërbëtorë të kryetares, që të tjera thotë dhe të tjera bën, duke e shndërruar në nul, moralin dhe ligjin për çdo qytetar të Durrësit.
Discussion about this post