Të dënuarit në burgun e sigurisë së lartë festojnë me alkool e “mall”, reagon drejtoria e Burgjeve: Nuk është ashtu siç duket

Drejtoria e Përgjithshme e Burgjeve ka reaguar pas publikimit të një videoje ku shfaqen disa të dënuar duke festuar brenda qelive në burgun e Durrësit, në prani të telefonave celularë, alkoolit dhe lëndëve narkotike.

Në pamje, sipas raportimeve, dallohen edhe emra të njohur të botës së krimit, të konsideruar me rrezikshmëri të lartë, si Lul Berisha, Fehmi Mziu dhe Islam Kasa, i njohur ndryshe si “Mitralozi”.

Videoja është publikuar nga gazetari Flamur Nezaj dhe, sipas Drejtorisë së Burgjeve, pamjet nuk janë ashtu siç duket pasi video ka qenë më herët në vëmendjen e strukturave të institucionit.

Në reagimin zyrtar bëhet me dije se personat e shfaqur në video janë identifikuar, ndërsa një pjesë e tyre rezulton se janë liruar ose transferuar përpara muajit janar 2026.

Për këtë rast, drejtoria e burgjeve thotë se kanë nisur verifikimet ndaj zinxhirit komandues të institucionit, me qëllim përcaktimin e përgjegjësive të mundshme.

Ndërkohë, Drejtoria thekson se kontrollet në institucionet e vuajtjes së dënimit janë intensifikuar dhe vijojnë pa ndërprerje.

Reagimi i plotë:

Deklaratë e Drejtorisë së Përgjithshme të Burgjeve

Në lidhje me videon e publikuar në rrjetet sociale nga gazetari Flamur Vezaj, sqarojmë si vijon:

Së pari, falënderojmë gazetarin për informacionin e bërë publik dhe inkurajojmë çdo qytetar apo gazetar të denoncojë çdo akt të paligjshëm apo shkelje që cenon sigurinë në institucionet penitenciare.

Së dyti, sqarojmë se personat e shfaqur në video janë identifikuar nga strukturat tona dhe rezulton se një pjesë e tyre janë liruar ose transferuar përpara muajit janar 2026.

Menjëherë pas qarkullimit të videos është njoftuar Shërbimi i Kontrollit të Brendshëm në Sistemin e Burgjeve dhe kanë nisur procedurat për hetim të plotë. Hetimi përfshin të gjithë personat e identifikuar në video, si dhe verifikimin e plotë të zinxhirit komandues në IEVP Durrës, me qëllim përcaktimin e përgjegjësive në çdo nivel. Paralelisht, strukturat e IEVP Durrës vijojnë kontrollet intensive me qëllim identifikimin e plotë të përgjegjësive dhe fillimin e çështjeve penale për personat e përfshirë.

Situata aktuale nuk është ajo që paraqitet në video. Kontrollet janë intensifikuar dhe vijojnë në mënyrë të pandërprerë. Në vijim të kontrolleve të ushtruara gjatë muajit prill, gjatë ditës së sotme janë zhvilluar kontrolle të befasishme dhe të imtësishme në disa institucione.

Në IEVP Durrës janë kapur në flagrancë dhe sekuestruar 3 telefona celularë. Poseduesit e këtyre pajisjeve janë ndër personat e identifikuar në video. Ndaj tyre janë marrë masa të menjëhershme, duke u kaluar në veçim dhe duke u proceduar penalisht.

Drejtoria e Përgjithshme e Burgjeve nuk toleron asnjë shkelje. Çdo rast trajtohet me masa konkrete, përgjegjësi individuale dhe ndjekje penale.

Mesazhi është i qartë: siguria nuk negociohet. Çdo shkelje do të goditet pa kompromis dhe kontrolli në institucionet penitenciare do të vijojë të forcohet çdo ditë.