Kryeministri Edi Rama u largua nga salla e Kuvendit pas votimit të projektligjit për Bankën e Shqipërisë, ndërsa seanca plenare u shoqërua me tensione të forta dhe përplasje mes opozitës dhe mazhorancës.
Gjatë zhvillimit të seancës, deputetët e Partisë Demokratike hodhën sende në drejtim të kryeministrit, ndërsa bllokuan foltoren dhe ndezën flakadanë në sallën e Parlamentit.
Tensionet u përshkallëzuan edhe pas përplasjeve verbale mes kreut të Partisë Demokratike, Sali Berisha, dhe kryetarit të Kuvendit, Niko Peleshi. Për shkak të situatës së krijuar, seanca plenare u ndërpre dy herë.
Pas incidenteve, nga seanca u përjashtuan katër deputetë të Partisë Demokratike: Blendi Himçi, Ivi Kaso, Xhelal Mziu dhe Bledion Nallbati.
Pavarësisht tensioneve dhe bllokimit të foltores nga opozita, Kuvendi vijoi me votimin e projektligjeve të rendit të ditës, pa zhvilluar diskutime.
Seanca e kësaj të enjteje u karakterizua nga përplasje të vazhdueshme mes palëve, ndërsa opozita kundërshtoi vijimin e punimeve parlamentare.
Discussion about this post