Deklarata e Sekretarit të Përgjithshëm të PD Gazment Bardhi ka shkaktuar reagime të shumta tek përfaqësuesit e LSI-së.
Mbrëmjen e së enjtes pati një postim nga kryetarja Monika Kryemadhi, ndërsa sot ka reaguar dhe ish-kandidatja për deputete e kësaj partie në qarkun e Elbasanit, Miranda Rira.
Me anë të një postimi të bërë në rrjetet sociale shkruan se edhe pse PD dhe LSI ishin në koalicion për zgjedhjet e 24 prillit, Partia Demokratike u kërkonte qytetarëve të mos e votonin Lëvizjen Socialiste për Integrim. Konkretisht bëhet fjalë për demokratin Lefter Gështenja, i cili siguroi dhe mandatin e deputetit. Rira madje i shkroi dhe një mesazh Gështenjës duke i treguar se është në dijeni të deklaratave që ai bënte në takimet e fushatës elektorale.
Gjithashtu ajo njofton se i kishte dërguar një mesazh dhe Lulzim Bashës për atë çka po ndodhte.
Ky është mesazhi të cilin Rira ia ka dërguar deputetit demokrat Lefter Gështenja:
“Si je Lefter, jam Miranda Rira. Se pari, suksese! Se dyti, jam njoftuar nga anëtarët e LSI, se në takimet e tua ne Bërzeshtë dhe në Pishkash, ju ke thënë njerëzve publikisht mos votojnë LSI-në. Kjo më e pakta është naive, sepse nuk krijohet fryma duke përçarë votat e opozitës kur ne jemi në koalicion, dhe më e shumta është gjë e poshtër, sepse do të thotë të çosh ujë tek mulliri i Ramës. Do të të kërkoja të ishe më i kujdesshëm, pasi unë në takimet e mia kërkoj votë për kandidatët e LSI dhe nëse dikush thotë jam i djathtë, i them shumë mirë se jemi në koalicion për të përmbysur Ramën! Nuk krijoj as ndasi dhe as përçarje.
Nëse do bashkëqeverisim nesër dhe do jemi bashkë në parlament, fryma e bashkëpunimit krijohet që tani, dhe jo duke sabotuar atë që kryetari yt dhe kryetarja ime kanë firmosur. Të lutem mos përsëritet më kjo gjë, në të kundërt jam e detyruar të lajmëroj Kryetaren dhe Z. Bardhi. Jemi në betejë për fitore, për të shporrur Ramën dhe jo për të luftuar njeri-tjetrin! Faleminderit për mirëkuptimin dhe na priftë e mbara”, shkruhet në mesazhin e dërguar.
Discussion about this post