Deputetja e Partisë Demokratike, Jorida Tabaku ka kritikuar vendimin e qeverisë për përjashtimin nga TVSH-ja të importeve të pajisjeve dhe makinerive që do të përdoren për prodhimin e armëve.
Sipas saj, kjo masë nuk përbën një strategji për zhvillimin e industrisë shqiptare të mbrojtjes, por një lehtësi fiskale të krijuar për kompani të veçanta.
Tabaku deklaron se përfituesi kryesor i kësaj skeme duket të jetë kompania KAYO, e cila sipas saj ka përfituar edhe më herët nga lehtësira dhe asete.
“Në Shqipërinë e Edi Ramës, politika fiskale nuk përdoret për të nxitur ekonominë. Përdoret për të zgjedhur fituesit.
Përjashtimi nga TVSH-ja vetëm për pajisjet dhe makineritë e përdorura nga prodhuesi shqiptar, nëpërmjet një VKM-je, nuk ndërton një politikë për industrinë shqiptare të mbrojtjes, por krijon një regjim përjashtimesh fiskale që, sipas mënyrës si është hartuar, duket se është projektuar për një numër shumë të kufizuar përfituesish.
Në realitet, përfituesi kryesor duket të jetë KAYO dhe interesat që qëndrojnë pas kësaj kompanie, e cila ka përfituar më parë edhe tokë publike, tokë private dhe lehtësi të tjera”, shkruan Tabaku.
Deputetja demokrate e ka krahasuar këtë qasje me modelin e ndjekur më herët me investitorët strategjikë, ku sipas saj kompani të caktuara kanë përfituar prona publike, lehtësi fiskale dhe trajtime të veçanta.
Sipas Tabakut, ndryshon vetëm fusha e aktivitetit, ndërsa mënyra e shpërndarjes së privilegjeve mbetet e njëjtë.
Discussion about this post