Partia Demokratike ka denoncuar sot një tjetër skandal qeveritar, që përfshin ministren e Energjetikës dhe Infrastrukturës, Belinda Balluku.
Deputetja e PD-së Elda Hoti, në një deklaratë për shtyp, dha detajet e skandalit të tenderit të Urës së Milotit, që evidentoi se i është dhënë një kompanie me pronar një person të kërkuar nga drejtësia dhe me precedentë.
“Si deputete e Lezhës sot do të bëj publike një tjetër aferë korruptive të Belinda Ballukut në qarkun tim, në xhepat e taksapaguesve lezhjanë nga Miloti deri në Reps. Në këtë garë morën pjesë 6 kompani, por në mënyrë të dyshimtë, në mungesë konkurrence dhe me flamur të kuq u skualifikuan ofertat më të favorshme për shtetin, përfshirë edhe atë me çmimin më të ulët. A thua se ishte rastësi?”, tha ligjvënësja demokrate mes të tjerash.
Kompania ‘Junik’ shpk është në pronësi të Ded Malutajt, një emër tashmë i njohur për organet e drejtësisë. Ai është shpallur në kërkim në maj të vitit 2022, pasi u akuzua për mashtrim ndaj Prokurorisë së Elbasanit, me një dëm prej 35 milionë lekësh.
Më tej Hoti shpjegoi se as kreu i ARRSH-së Gentian Gjyli nuk e ka ndaluar tenderin apo përjashtuar kompaninë në fjalë, edhe pse u konstatuan problematika, por u shpall fituese ‘JUNIK’ shpk & ‘JOOS & KRASNIQI – BAZE’, me vlerë rreth 1 mln euro prokurim.
“Një kompani në pronësi të Ded Malutajt, një emër tashmë i njohur për organet e drejtësisë. Ai është shpallur në kërkim në maj të vitit 2022, pasi u akuzua për mashtrim ndaj Prokurorisë së Elbasanit, me një dëm prej 35 milionë lekësh. Ai, së bashku me të tjerë, ka instaluar sisteme të dëmtuara kondicionimi duke shkelur kriteret e tenderit dhe mashtruar një institucion të drejtësisë”, tha Hoti mes të tjerash.
Deklarata e plotë:
“Si deputete e Lezhës sot do të bëj publike një tjetër aferë korruptive të Belinda Ballukut në qarkun tim, në xhepat e taksapguesve lezhjanë nga Miloti deri në Reps.
Një tjetër vjedhje dhe allishverish që rëndon mbi xhepat e qytetarëve. Një tjetër tender i dyshimtë, i paracaktuar, pjesë e aferave dhe interesave klienteliste. Një tjetër dëshmi e fytyrës dhe dorës kleptomane të kësaj qeverie.
E kam fjalën për tenderin me objekt:
‘Ndërhyrje emergjente për mbrojtjen e themeleve në urën e Milotit’, me një fond limit prej 1 milion euro.
Në këtë garë morën pjesë 6 kompani, por në mënyrë të dyshimtë, në mungesë konkurrence dhe me flamur të kuq u skualifikuan ofertat më të favorshme për shtetin, përfshirë edhe atë me çmimin më të ulët. A thua se ishte rastësi?
Jo! Ky ishte një plan i mirëmenduar, një skemë klasike për të favorizuar klientët e qeverisë. Fitues u shpall bashkimi i operatorëve ‘JUNIK’ shpk & ‘JOOS & KRASNIQI – BAZE’, me një ofertë prej 867 mijë euro, plot 233 mijë euro më shumë se oferta më e lirë që mund të ishte përzgjedhur.
Kush është ‘Junik’ shpk?
Një kompani në pronësi të Ded Malutajt, një emër tashmë i njohur për organet e drejtësisë. Ai është shpallur në kërkim në maj të vitit 2022, pasi u akuzua për mashtrim ndaj Prokurorisë së Elbasanit, me një dëm prej 35 milionë lekësh. Ai, së bashku me të tjerë, ka instaluar sisteme të dëmtuara kondicionimi duke shkelur kriteret e tenderit dhe mashtruar një institucion të drejtësisë.
Por ky fakt, që do duhej ta kishte përjashtuar automatikisht nga çdo garë publike, nuk e ka ndalur Gentian Gjylin, drejtuesin e ARRSH-së, për ta shpallur sërish fitues.
Kjo nuk është vetëm një shkelje e ligjit, por një poshtërim për çdo qytetar shqiptar, që punon dhe paguan taksa të cilat shkojnë për klientë të pushtetit.
Kjo është prova që konkurrenca është vrarë, që ligji nuk vlen, dhe që narko-regjimi vazhdon abuzimin me fondet publike, për interesa klienteliste”.
Discussion about this post