Derbi midis Inter dhe Milan është një nga ndeshjet që zgjon interes shumë të lartë jo vetëm në Itali, po në të gjithë botën ku ka tifoz të këtyre dy ekipeve.
Ndërsa ka folur në prag të kësaj ndeshjeje, sulmuesi i Milan, Oliver Giroud, në një intervistë për ‘La Gazzetta dello Sport’ është shprehur se qëllimi i fitores së kësaj sfide është dërgimi i ‘Zikaltërve’ në -10 pikë larg nga kreu i Seria A, që aktualisht ‘Kuqezinjtë’ e Italisë e ndajnë me Napolin me pikë të barabarta.
“Është një ndeshje shumë e rëndësishme si për ne por edhe për ata. Të fitojmë e të dërgojmë Interin 10 pikë pas nesh nuk do të ishte aspak keq edhe pse ka ende shumë ndeshje deri në përfundimin e sezonit.”-tha ai.
Më tej, i pyetur për titullin kampion të këtij sezoni, francezi shprehu besim të plotë që do të fitohet nga ekipi i tij.
“E përse të mos besojmë, jemi duke bërë një lojë shumë të bukur dhe jemi pretendentë për ta fituar atë. Ndaj Inter-it duhet të tregohemi të kujdesshëm sepse ata nuk janë një ekip i lehtë për tu mundur, janë të rrezikshëm në kundërsulme dhe mbrohen shumë mirë”-shtoi sulmuesi.
Derbi i ‘San Siros’ do të zhvillohet këtë të dielë në orën 20:45 dhe është i vlefshëm për javën e 12 të Seria A./K.T/Gijotina.com
Discussion about this post