Tirana ndalet nga Partizani në derbin e tretë sezonal në Superiore. Në një përballje që mbledh si gjithmonë mijëra tifozë, u nis gjithçka me solidarizimin për Ukrainën e më pas shfaqja nisi në fushë dhe jashtë saj. Tirana e nisi më mirë ndeshje ku më i rrezikshmi ishte Xhixha me disa aksione por në 31” spektaklin e shëmtuar e japin tifozët që mbushin stadiumin me tymuese duke detyruar arbitrin Xhaja të ndërpresë për 2-3 minuta duelin. Me t’u rikthyer normaliteti, provon edhe Partizani të rrezikojë me Bitrin por pa shënuar. Pjesa e parë mbyllet dhe me një incident ku pranë Xhixhës hedhin një kapsolle por asgjë serioze për lojtarin bardheblu.
Pjesa e dytë është edhe më e bukur ku të dyja skuadrat luajnë më hapur dhe shkojnë shpejt në portat kundërshtare, gjithsesi pa konkretizuar. Momenti deçiziv që do të kishte ndryshuar ndeshjen ishte në 67’ ku Stenio Junior merr një top nga krahët dhe me portën e boshatisur ai në mënyrë të pashpjegueshme e nxjerr jashtë. Gjithsesi Tirana provon të gjejë portën ku ekipet janë hapur shumë dhe Seferi është shumë i rrezikshëm në dy raste pa arritur të shënojë. Fundi është një barazim i bukur në fushë por që nuk kënaq asnjë prej ekipeve me Tiranën që mbetet e para por Partizani frenohet drejt vendit të tretë.
Discussion about this post