Këtë të shtunë në orën 19:45 në stadiumin ‘Air Albania’ do të luhet derbi Tirana-Dinamo, i vlefshëm për javën e tetë të Superligës.
Duke folur në prag të kësaj sfide, tekniku i Dinamos, Blendi Shkëmbi ka theksuar se fitorja e parë e ekipit të tij ndaj ‘Bardhebluve’ tregoi se ‘Nëndetësja Blu’ është duke u rritur.
“Fitore në “Kupën e Shqipërisë” na jep më shumë moral dhe qetësi. Jemi të bindur që ndeshja e kampionatit ndryshon nga ajo e Kupës. Në futboll dëmtimet ndodhin, fat i keq për ne, por lojtarët që do të luajnë do të bëjnë mirë. Ne do të rritemi ditë pas dite, ndeshje pas ndeshje. Vazhdoj të them se kemi bërë një kampionat të mirë sa i përket lojërave, do të donim të kishim më shumë pikë. Kemi humbur pikë edhe për gabimet tona, por në fund të kampionatit çdo ekip do të marrë atë që meriton. Nuk ka favorizim, nuk më intereson kush luan apo mungon te kundërshtari. Janë ekipe që kanë 20 lojtarë dhe lojtarët që luajnë duhet të bëjnë maksimumin.”-tha ai.
Më tej tekniku shtoi se kundërshtari do bënte mirë që ta merrte seriozisht skuadrën e tij dhe e paralajmëroi se do e këtë shumë të vështirë.
“Në futboll fusha tregon, Skuka bëri shumë mirë, por duhet të jemi të gjithë me këmbë në tokë. Ajo që bëri Skuka nuk është gjithçka, duhet të bëjë më mirë ai dhe gjithë ekipi. Dy ndeshjet e fundit dhe atë të Kupës i cilësoj si ndeshjet më të mira, secili bën analizat e veta, por asnjë nuk e bën si trajneri analizën. Jam i bindur që çdo ndeshje që do të vijë do të jemi edhe më mirë. Dëgjoj që Tirana e nënvlerësoj ndeshjen e Kupës, por ata nuk po luanin me kalamajtë. Ishalla e nënvlerëson edhe nesër Tirana dhe të na shikojë si të vegjël. Nesër do të jetë një ndeshje tjetër, Tirana do të kërkojë të reagojë, por shpresoj që edhe ne të bëjmë më mirë”,-deklaroi ndër të tjera Shkëmbi./K.T/Gijotina.com
Discussion about this post