Derbi me Partizanin, Shkëmbi: Do tërhiqem vetëm nëse me pengojnë drejtuesit

Këtë të hënë Dinamo do të ndeshet me Partizanin në orën 19:45 në ‘Air Albania’ për sfidën e javës së 13 të Superligës.

Të dyja këto skuadra vijnë nga humbje dhe kanë mungesë të pikëve, ndaj dhe në derbi do mundohen për fitore.

Duke folur në konferencën për mediat në prag të kësaj sfide trajneri i ‘Bluve’, Beldi Shkëmbi u shpreh se gabimet janë në fushë, ndërsa theksoi se klubi ia ka ofruar të gjitha lojtarëve.

“Vazhdojmë me situatën e keqe, ne me skuadrën flasim, por në futboll fjalët janë të tepërta dhe duhet të reagosh në fushë. Të japësh në maksimumin për atë që përgatitet gjatë javës, duhet të ndryshojmë dhe të marrim rezultat. Ne jemi një klub model, stafi dhe futbollistët i kanë të gjitha. Problemi jemi ne të fushës, stafi dhe futbollistët. Futbolli ka momentet e veta delikate, ka të bëjë edhe ana psikologjike. Janë mbledhur bashkë mungesat dhe gabimet individuale, por në fund asnjë nga këto nuk është justifikim se ne stërvitemi dhe jemi këtu për ta ndryshuar këtë situatë. Ne dëshirojmë tre pikët, duhet të jemi shumë të përqendruar se në ndeshje të veçanta kemi pësuar dhe nuk kemi ditur të reagojmë. Duhet të jemi 100% nga çdo anë.”-tha ai.

Më tej tekniku shtoi se do të tërhiqej vetëm në rast se do i ndërhyhej në punë nga ana e drejtuesve.

“Nuk e kam, menduar ndonjëherë tërheqjen, kanë rënë shumë pikëpyetje në atë se çfarë kam bërë unë dhe stafi. Do të tërhiqem kur presidenti dhe skuadra të mos më ndjekë dhe të mos jetë e imja në dhomat e zhveshjes. Jam i bindur që me një fitore do të rikthehemi ajo Dinamo e fillimit dhe më e rëndësishmja është që kemi grupin e plotë. Kampionati është i ngjeshur dhe objektivin do ta shohim pas këtyre tre ndeshjeve. Do të bëjmë merkato, por tre ndeshjet e radhës janë deçizive.”-shtoi ai.

Ndër të tjera Shkëmbi ka theksuar se problemi kryesor i ekipit të tij ka qenë te mungesat për shkak të dëmtimeve.

“Edhe ne si staf mund të kemi bërë diçka gabim dhe nuk e kam të sikletshme ta them, por momenti kyç kanë qenë dëmtimet, erdhi humbja me Tiranën dhe më pas kaluam në një ngërç psikologjik. Tashmë që lojtarët po kthehen përveç Isaevskit, edhe lojtarët i shoh me entuziazëm e me besim.”-deklaroi trajneri i ‘Nëndetëses Blu’./K.T/Gijotina.com