Është dita e derbit. Partizani dhe Tirana do të ndezin kryeqytetin me supersfidën ndërmjet dy rivalëve historikë. Duel si asnjë tjetër. Një ndeshje që nis përpara 90-minutëshit të fushës e që vazhdon përtej. Përtej rivalitetit të fortë në lojë dhe në tribuna, derbi është një ditë feste.
Këtë e ka të qartë edhe trajneri Veselinoviç, i emëruar prej pak javësh në stolin e të kuqve.
“Do të jetë një ditë feste, nuk ka presion për këtë ndeshje. Nuk e ndjej apo ta shoh të ketë presion. Të gjithë ata që do të jenë të pranishëm në stadium, trajnerët, lojtarët në fushë dhe tifozët në tribuna duhet ta përjetojnë këtë ndeshje si një festë. Personalisht e përjetoj këtë ndeshje pa presion, këtë përpiqem t’ia përcjell edhe lojtarëve. Nuk dëshiroj të flas për Tiranën, mendoj vetëm për Partizanin. Ata kanë mjaft lojtarë të mirë, edhe pse janë një skuadër e re. E thashë që ne i respektojmë, por duhet të mendojmë për veten tonë dhe jemi të fokusuar vetëm në punën tonë”, deklaroi trajneri serb i Partizanit.
Tirana nuk fiton në derbi prej afro dy vjetëve. Një triumf në këtë supersfidë do të zhbllokonte ekipin, që deri më tani ka regjistruar vetëm barazime.
Walid Jarmouni, sulmuesi i Tiranës, theksoi: “Ndihemi mirë përpara këtij derbi. Kemi luajtur 5 ndeshje të mira, edhe pse fatkeqësisht rezultatet nuk ishin ato të pritshmet. Derbi është momenti i duhur për të gjetur fitoren e parë, kjo është e rëndësishme për klubin dhe për tifozët tanë. Natyrshëm ka disi presion pasi po pritet me padurim nga tifozët kjo fitore, por jemi besimplotë për t’i arritur synimet tona. Jemi gati për këtë ndeshje, derbi dihet që ka trysninë e vet, por nuk është aspak negative, është një motivim shtesë”.
Derbi Partizani-Tirana luhet në Arenën Kombëtare, duke nisur prej orës 20:00.
Discussion about this post