Ditën e sotme do të zhvillohen një sërë ndeshjes të kampionateve kryesore evropiane, ku pritet të zbresin në fushë edhe lojtarë të Kombëtares shqiptare.
Southapton do të presë Brighton në orën 16:00 për takimin e javës së15 të Premier League. Ndonëse nuk dihet ende nëse talenti ‘Kuqezi’, Armando Broja do të jetë pjesë e formacionit startues të skuadrës së tij, e sigurt është se në qoftë se ai do të zbresë në fushë do të bëjë diferencën.
Aktualisht Southampton renditet në vend të 15 me 15 pikë, teksa kundërshtarët e tyre të kësaj sfide qëndrojnë në vendin e 9 të tabelës së Premier League me 19 pikë.
Në të treja sfidat e Seria A që do të luhen ditën e sotme do të kemi prani të lojtarëve shqiptare. Milan do të ndeshet me Salernitanën për raundin e 16 të kampionatit në orën 15:00, ndërsa ende nuk dihet nëse në fushë do të zbresë Frederic Veseli.
Vendasit renditen në vendin e 2 të tabelës së kampionatit kryesor italian, teksa Salernitana qëndron në vend të fundit me vetëm 8 pikë dhe duket se kjo ndeshje ka për të qenë shumë e vështirë.
Ora 18:00 rezervon një sfidë shumë interesante midis Romës dhe Interit. Pjesë e skuadrës së ‘Verdhekuqve’ është edhe mbrojtësi shqiptar Marash Kumbulla, i cili kaloi një periudhë shumë të keqe nën fillimin e drejtimit të trajnerit Jose Mourinho, i cili e shfaqi hapur mospëlqimin ndaj talentit ‘Kuqezi’. Megjithatë tashmë duket se situata mes tyre është qetësuar dhe mund të ndodh që ta shohim Kumbullën të zbresë në fushë edhe në një ndeshje shumë të rëndësishme siç është kjo e sotmja. Aktualisht ekipi i Romës është duke kaluar në një periudhë të vështirë me mungesën e rezultateve dhe renditet në vend të 5 me 25 pikë, teksa ‘Zikaltërit’ e Inter qëndrojnë të 3 me 34 pikë.
Ndërsa ora 20:45 pritet të sjellë një derbi shqiptarësh në Seria A me takimin Napoli-Atalanta. Te skuadra e Napolit është titullar lojtari i përfaqësues së Kosovës, Amir Rrahmani, teksa te Atalanta ka po rol të padiskutueshëm në formacion mbrojtësi i Kombëtares shqiptare, Berat Gjimshiti.
Kjo sfidë pritet të jetë shumë e luftuar me vendasit që mbajnë kreun e tabelës së Seria A me 36 pikë dhe që duan të përforcojnë pozitat dhe Atalantën që qëndron në vend të 4 me 31 pikë dhe që kërkon një rritje të mëtejshme./K.T/Gijotina.com
Discussion about this post