Policia ka goditur një rrjet kontrabande qeniesh njerëzore duke vendosur në pranga 3 persona gjatë operacionit policor të koduar “Rrjeti” i realizuar në bashkëpunim me agjencitë ligjzbatuese amerikane pranë Ambasadës së ShBA në Tiranë.
Në pranga kanë rënë Cerkez Nikoci, 62 vjeç, Hazir Maçi, 58 vjeç, dhe Ardjan Pirani, 58 vjeç, pasi dyshohet si të përfshirë në një rrjet kontrabande qeniesh njerëzore, e njohur ndryshe si dhënie ndihmë për kalim të paligjshëm të kufirit, shtetasve shqiptarë, drejt Kanadasë, Shteteve të Bashkuara etj.
I dyshuari kryesor, 58-vjeçari Hazir Maçi, akuzohet se në bashkëpunim me shtetas të tjerë, nëpërmjet sigurimit të dokumenteve të udhëtimit të falsifikuara, ka kontrabanduar disa shtetas shqiptarë, nga Shqipëria drejt disa vendeve të BE, prej andej në vende të ishujve Karaibe dhe më pas në shtete të tjera, me qëllim final premtimin dhe dërgimin e tyre në Kanada dhe Shtetet e Bashkuara të Amerikës.
Gjithashtu, dyshohet se Hazir Maçi, me precedent të mëparshëm në këtë aktivitet kriminal, merrte shuma nga 20 deri në 35 mijë dollarë, me premtimin e dërgimit të tyre në Kanada dhe Shtetet e Bashkuara.
Gjatë hetimeve dhe pas arrestimit, të dyshuarve iu janë sekuestruar shuma të mëdha parash cash, dokumente të ndryshme udhëtimi false, si dhe sende dhe prova të tjera në interes të hetimit.
Discussion about this post