Gjermania do të presë nesër Francën në një ndeshje miqësore në Dortmund. Në prag të kësaj klasikeje të futbollit europian, trajneri i “Gjelave”, Deshamp ka dalë në konferencë për shtyp.
“Kishim një debat me Grizman që zgjati maksimumi 1 minutë e 30 sekonda… Në ndeshjen e fundit luajtëm kryesisht në të majtë, megjithëse mundëm të krijonim rreziqe në krahun e djathtë. Prania e Mbape në krahun e majtë rrit përdorimin nga kjo anë. Është bukur të zhvillohet një ndeshje miqësore mes dy kombeve të mëdha.”
Tekniku foli dhe për shkarkimin e kolegut të tij Hansi Flik, pas disfatës me Japoninë.
“Më vjen keq për Hansi Flik, ai është një person që e vlerësoj. Ai, si unë, e di shumë mirë se çfarë të presë kur nuk ka rezultate. Ka sjellë zhgënjime në tre ndeshjet e fundit, por kjo nuk e vë në dyshim potencialin e kësaj kombëtareje. E di shumë mirë që nesër do të ketë një përgjigje prej tyre.”
Në fund, ish-futbollisti i Juventusit foli dhe për sulmuesin e tij Randall Kolo Muani, për të cilin vlerësoi rritjen e tij si lojtar.
“Ai ka pasur rritje fenomenale, i përmbushi pritshmëritë tona, para dhe gjatë Kupës së Botës. Te PSG do të ekspozohet më shumë, është ana tjetër e medaljes. Kolo Muani e di mirë këtë.”
Discussion about this post