Gati gjashtë vite pas vdekjes së Diego Armando Maradonës, në Argjentinë vazhdon procesi gjyqësor që synon të zbardhë rrethanat e ndarjes së tij nga jeta.
Para gjykatës dëshmoi masazhatori i legjendës argjentinase, Nicolas Taffarel, i cili përshkroi gjendjen e rënduar të Maradonës në javët para vdekjes së tij, më 25 nëntor 2020.
“S’ngrihej nga shtrati, nuk donte të hante dhe nuk donte të lahej”, deklaroi Taffarel, duke shtuar se kishte kërkuar vazhdimisht nga stafi mjekësor që ish-futbollisti të monitorohej çdo ditë. Sipas tij, këtë shqetësim e vërteton edhe një mesazh audio i paraqitur si provë në gjykatë.
Masazhatori kujtoi edhe takimin e fundit me Maradonën, më 24 nëntor 2020. “I propozova të pinim një mate. Ai më tha: ‘Nuk dua asgjë, Taffita, mjafton kaq’. E pyeta se çfarë donte të thoshte dhe ai u përgjigj: ‘Asgjë, mjafton kaq’”, dëshmoi ai.
Në procesin gjyqësor po shqyrtohen edhe orët e fundit të jetës së Maradonës. Shtatë anëtarë të ekipit mjekësor akuzohen për neglizhencë dhe mungesë të kujdesit të duhur ndaj legjendës së futbollit, akuza të cilat ata i kanë mohuar. Nëse shpallen fajtorë, rrezikojnë dënime deri në 25 vjet burg.
Discussion about this post