Një sherr banal për një parcelë me kanabis ka çuar në vrasjen e Piro Prronit, 61 vjeç, në fshatin Abat të Shalës në Shkodër. Autori i krimit, Ndoc Maçaj, kryeplak i fshatit dhe njëkohësisht kushëri i viktimës, është vetëdorëzuar në polici dhe ka rrëfyer të gjithë dinamikën e ngjarjes.
Në dëshminë e tij të zbardhur nga dosja e hetimit, Maçaj pretendon se ka vepruar në kushtet e vetëmbrojtjes. Ai tregon se më 28 gusht, rreth orës 17:00, ndodhej në zonën “Pushime” për të kontrolluar territorin, si pjesë e detyrës së tij si kryeplak, kur ka konstatuar parcelën e kultivuar me rreth 70-80 rrënjë kanabisi në tokën e tij.
Në atë moment, ai është përballur me kushëririn e tij, Piro Prroni, i cili i ka dalë para me një drapër në dorë dhe i ka thënë: “Çfarë lyp këtu?”. Sipas Maçajt, debati ka eskaluar shpejt dhe Prroni, duke e kërcënuar, i është afruar duke i thënë: “Jemi tek për tek, po të myti!”.
Maçaj thotë se është tërhequr pas dhe i ka kërkuar të mos i afrohej, por viktima ka vazhduar të ecë drejt tij, duke e kërcënuar edhe me një thikë që e kishte në brez. Për t’u mbrojtur, Maçaj ka qëlluar njëherë në ajër, por pasi Prroni ka vazhduar të afrohet, ai e ka qëlluar në krahun e majtë, në shpatull.
Pas vetëdorëzimit të Maçajt, policia ka sekuestruar armën e krimit dhe ka zbuluar parcelën me kanabis. Të gjitha rrënjët e kanabisit janë asgjësuar, ndërsa 5 prej tyre janë marrë si provë materiale për ekzaminim në laborator.
Dëshmia e autorit do të shqyrtohet nga Prokuroria për të përcaktuar nëse vrasja ka ndodhur me të vërtetë në kushtet e vetëmbrojtjes apo nëse motivet e krimit janë më të thella se sa thjesht mbrojtja e pronës.
Discussion about this post