Dëshmia e Murselit, reagon këshilltari i Pacollit

Jetlir Zyberaj, këshilltari i kreut të AKR-së Behgjet Pacollit, ka reaguar pas publikimit në media të dëshmisë së Naim Murselit, lidhur me motivet që e çuan në vrasjen e bashkëshortes së tij Liridona Ademaj.

Zyberaj shkruan përmes një postimi në facebook se dëshmia tregoi qartë dhe hodhi poshtë pretendimet e të gjithë analistëve dhe gazetarëve që ngrinin pikëpyetje mbi përfshirjen e Pacollit në ngjarje.

Ai shtoi se analistë të caktuar, të kthyer në mercenarë tentuan të bënin pis figurën e kreut të AKR-së.

“Shpifjet, shantazhet dhe të pavërtetat dashakeqe të krijuara nga një gjuhë mercenare e qëllimshme duhet të luftohen vazhdimisht.

Arian Curri, një i ashtuquajtur analist, që thirrej në burime të prokurorisë por edhe Grida Duma qe e arsyetonte dhe mbronte këtë shpifës a kanë ndonjë shpjegim tash? Sepse pas publikimit të dosjes nga gazetari Vehbi Kajtazi, po del që të gjitha thirrjet e Currit në burime brenda prokurorisë ishin shpifje dhe skemë e mirëmenduar.

Arjan Curri i ngjason shumë një monstrumi si Naim Murseli. Të perbashkët e kanë planifikimin. Përderisa Murseli planifikoi vrasjes mizore të gruas së tij, Curri planifikoi dëmtimin e imazhit të Pacollit nëpërmjet një skeme të mirëmenduar. Madje thirrej në burime të prokurorisë së Kosovës.

Eleminimi i skemave të shantazhit dhe shpifjes është kusht i domosdoshëm profesional, që nuk duhen toleruar asnjëherë dhe kurrë”, shkruan ai.

Naim Murseli deklaroi në dëshminë e tij, se vrasja ishte planifikuar prej tij pas mosmarrëveshjeve në çift, të cilat kishin lindur pas disa mesazheve që i ishin dërguar Liridonës dhe një  tradhtie nga ana e saj.

“Një problem familjar ku kanë dal në shesh disa SMS me një të afërt. Këto SMS ia kanë dërguar bashkëshortes sime dhe kjo e ka rënduar tej mase lidhjen tonë martesore. Pas kësaj ngjarje, presioni dhe kontrolli ndaj meje është shtuar ku unë kam kërkuar ndarjen mirëpo kategorikisht bashkëshortja nuk ka pranuar dhe në një ndejë në Malmo të Suedisë, bashkëshortja më ishte hakmarrë duke më tradhtuar me një person të huaj aty.

Këtë ngjarje unë e kam parë me sytë e mi mirëpo nuk ia kam shprehur në asnjë moment. Kjo ngjarje sigurisht që më ka rënduar dhe ndikuar në raportin tonë. Unë si bashkëshort të gjitha kushtet ia kam plotësuar dhe kam dashur që ajo të jetë e lumtur”.