Në gjyqin për grupin kriminal të “Plumbit të Artë”, i penduari i drejtësisë Nuredin Dumani po vijon dëshminë e tij këtë të martë.
Ndër të tjera, ai tregoi se si arriti të lirohej nga qelia, pasi kishte qenë i arrestuar për disa vepra penale.
Dumani rrëfeu se avokati Alban Bengasi ka qenë ndërmjetës, ndërsa shtoi se ka pasur ndihmë nga dhëndri i vëllait të ish-ministrit të drejtësisë së kohës, Nasip Naço.
“Kam paguar para që të dilja nga burgu, kisha avokat Alban Bengasin. Më ka ndihmuar dhëndri i vëllait të Nasipit, që është mjek”, ka dëshmuar ai.
Më tej, ka shpjeguar se e ka ndihmuar dhe një mjek ligjor dhe u lirua në vitin 2014, por veprimet kishin nisur më herët, me ndihmën e avokatit.
“I bënë letrat sikur isha për të vdekur. Dhe më nxorën nga burgu gjasme vuaja nga zemra”, ka vijuar Dumani dëshminë e tij.
Gjithashtu, Dumani ka shpjeguar se dhëndri i vëllait të Nasip Naços në atë kohë ka qenë shef i spitalit, kurse ai ishte arrestuar për pengmarrje. Për të dalë nga qelia, ka paguar 40 mijë euro.
Por pasi siguroi dokumentin për probleme shëndetësore, u lirua. Më tej, Dumani ka treguar për njohjen me bashkëpunëtorin tjetër të drejtësisë, Erjon Alibej.
“Erjon Alibeaj kishte bërë një listë me dhjetë persona për t’i vrarë. Në krye të kësaj liste ishte Emiliano Ramazani dhe Talo Çela”, ka deklaruar Nuredin Dumani.
Këtë listë Alibeaj ia kishte dhënë Dumanit duke i thënë “i dua të vrarë se kanë marrë pjesë te vrasja e vëllait në Bradashesh”, sipas dëshmisë së të pandehurit.
SPAK po vijon procesin për dosjen e bujshme, ku ka disa të pandehur, të cilët kundërshtojnë rrëfimet e kreut të grupit të vrasësve me pagesë, Nuredin Dumani. Ky i fundit është në cilësinë e të penduarit, si bashkëpunëtor i Prokurorisë së Posaçme, duke rrëfyer të paktën 12 vrasje dhe dhjetëra krime të tjera në një dekadë, si dhe porositë që merrte për ekzekutime, me pagesa deri në 200 mijë euro.
Discussion about this post