Gledis Nano u shkarkua nga posti i kreut të policisë së shtetit pak kohë më parë. Dyshohet se Gledis Nano u bë “kokë turku” nga ministri i Brendshëm, Bledi Çuçi jo për mospërmbushje të detyrave por pas zhdukjes së Ervis Martinaj dhe zbulimit të ushtarëve të tij brenda policisë. Pak kohë më parë, në pranga ra Jeton Lami, një efektiv i Forcave Operacionale i cili ndihmoi “bosin e lojërave të fatit” të arratisej nën hundën e policisë.
Çelësi i zbulimit të fatit të Martinajt duket të jetë pikërisht Jeton Lami, i cili sipas gazetarit Elton Qyno ka qendruar dy orë e gjysmë “kokë më kokë” me Gledis Nanon në zyrën e këtij të fundit para se të shkarkohej nga Policia e Shtetit. Mësohet se Lami i ka treguar Nanos lidhjet e forta të Martinajt në Policinë e Shtetit, pagesat, personazhet që janë “ushtarë” të tij, por që mbajnë veshur uniform policie, etj.
Me të mësuar këtë, Nano i ka raportuar ministrit të Brendshëm Bledi Çuçi. Kjo ka qenë edhe pika që ka derdhur “gotën e mbushur” tashmë të raporteve të tensionuara Nano-Çuçi duke çuar në shkarkimin e Drejtorit të Policisë së Shtetit.
Ervis Martinaj njihej si personazhi që mpleksi fortë krimin me institucionet shtetërore, kryesisht policinë, duke mos bërë më dallimin se ku mbaron mafia dhe ku fillon shteti. Mësohet se Lami i ka dhënë Nanos emra të rendësishëm në Policinë e Shtetit që në fakt punonin për llogari të Ervis Martinajt, gjë që nëse zbulohen do të shkaktojnë një tërmet të madh në këtë strukturë.
Discussion about this post