Në seancën e zhvilluar ditën e sotme në Hagë për ish-drejtuesit e UÇK, në pyetje është marrë dëshmitari i ish-komandantit Salih Mustafa.
Dëshmitari i parë ka qenë jo i qartë në dëshmitë që ka dhënë pasi në seancën e sotme gjyqësore për Mustafën, tha se si pasojë e lëndimeve në trup nga dhuna e ushtruar në Zllash ka pasur nevojë të operohet, por nuk e di nga çfarë. Kur u pyet nga avokati Julias Von Bone nëse ka qenë te mjeku për këto lëndime, dëshmitari ka thënë që jo sepse i ka ardhur zor të shkojë tek mjeku.
Pasi u pyet nga avokati se pse i ka ardhur zor të shkoj tek mjeku, dëshmitari u përgjigj se nuk ka qenë mirë të tregoje se e kishte rrahur UÇK-ja. Më tej ai ka treguar se është operuar dhe vetëm mjeku e di çfarë ka pasur.
“Ai më ka bërë operacion, ai e ka ditur çfarë kam pasur. Ai më ka pyetur se çfarë ke. Unë i kam thënë që nuk e di. Por, ai e di sepse ai më ka bërë operacion” – tha dëshmitari.
Avokati ka kërkuar sqarime nga dëshmitari në lidhje me deklaratën se ka pasur probleme shëndetësore, ndërkohë që në dokument thuhet se dhimbja e kokës i ka zgjatur vetëm një vit.
