Menjëherë pas mbledhjes së qeverisë, ministri i brendshëm Bledi Çuçi nuk ka hezituar të komentojë vendimin për largimin nga detyra e drejtorit të Policisë së Shtetit të Ardi Veliut dhe zëvendësimin e tij me drejtuesin e ri të emëruar Gledis Nano.
Çuçi tha se duhej energji e re për të realizuar objektivat e mandatit të tretë dhe se Gledis Nano ka një sfidë.
“Besoj se të gjithë treguesit e sektorit të policisë flasin për një rritje dhe një standard të krijuar tashmë të performancës së Policisë së Shtetit në nivele maksimale. Z. Nano që zëvendëson Veliun, pa diskutim që ka një sfidë për ta çuar përpara këtë performancë të shkëlqyer të policisë në këto vite”, ka thënë ai.
I pyetur nëse reforma e vetme ishte shuarja e kandilit të Ardi Veliut, ai përgjigjet:Në radhë të parë e keni keqkuptuar pjesën e kandilit, janë situata që krijohen në dinamikën e debateve. Kam vlerësimin më të madh për zotin Veliu, duke nisur nga përgjysmimi i vrasjeve, është rritur besueshmëria te policia e shtetit, operacioni Forca e Ligjit. Do ketë 100 ditë, do të ketë 300 ditë, pasi ne vazhdimisht kërkojmë përmirësimin”, ka shkruar ai.
Cuçi përmendi operacionin Forca e Ligjit dhe tha se janë përgjysmuar vrasjet, ndërsa sipas tij është rritur besimi te Policia e Shtetit.
