Ish-kryeministri i Kosovës Avdullah Hoti ka hedhur akuza të rënda në drejtim të pasuesit të tij, Albin Kurti. Ai u shpreh se qeverisja e tij është e dështuar, se madje dhe në kohë të pandemisë është punuar më shumë.
“I kanë bllokuar investimet kapitale në gjithë Kosovën, të cilat kurrë nuk kanë qenë më të ulëta. Edhe në kohën e pandemisë është punuar më shumë në projekte në gjithë Kosovën.
I kanë palosur mbi 700 milionë euro në llogari bankare të Qeverisë. E tash marrin kredi 47 milionë euro për ndihma sociale, prej të cilave 15 milionë janë për pagesat e bëra për ndihma sociale për janar, shkurt dhe mars 2021, kur ka qenë pandemia, të cilat pagesa po bëhen gati dy vite që janë kryer”, shkruan Hoti.
Për ish shefin e ekzekutivit “është e pafalshme”, që qeveria Kurti të drejtojë vendin në vijimësi.
“Ky është dështim total. Është dëm i madh për vendin çdo ditë që kjo klasë politike e paaftë dhe e mbrapshtë mbetet në qeverisje. Është e pafalshme të lejohet edhe më tutje kjo lloj qeverisjeje”, thekson Hoti i revoltuar.
Discussion about this post