Dështon grushti i shtetit në Bolivi, arrestohet gjenerali

Autoritetet e Bolivisë kanë arritur të shmangin një grusht shteti, e cila mund të kishte përfunduar në tragjedi. Presidenti i vendit, Luis Arce, arriti të zmbraps rebelët ushtarakë të drejtuar nga një gjeneral renegat, i cili kishte arritur të futej në pallatin presidencial.

Njësitë ushtarake të udhëhequra nga gjenerali Juan Jose Zuniga, të cilit së fundmi iu hoq komanda, ishin mbledhur në sheshin qendror, pranë pallatit presidencial dhe Kongresit.

“Sot vendi po përballet me një përpjekje për grusht shteti. Sot vendi përballet edhe një herë me interesa në mënyrë që demokracia në Bolivi të ndërpritet”, tha Arce në komentet nga pallati presidencial, me ushtarë të armatosur jashtë.

Disa orë më vonë, ushtarët filluan të tërhiqeshin nga sheshi dhe si rrjedhojë policia mori kontrollin e sheshit. Autoritetet boliviane arrestuan ish-gjeneralin Zuniga dhe e morën me vete.

“Në cilësinë time si ministër, dua t’i them popullit bolivian se në këtë pikë, edhe pas një takimi me presidentin, ne kemi kontroll total dhe absolut mbi forcat tona të armatosura përmes komandës ushtarake. Gjithçka është tani nën kontroll”, tha ministri i Mbrojtjes, Novillo.

Përpara sulmit në pallatin presidencial, Zuniga iu drejtua gazetarëve në shesh dhe përmendi zemërimin në rritje në vendin pa dalje në det, i cili po lufton me një rënie ekonomike me rezervat e varfëruara të bankës qendrore dhe presionin mbi monedhën boliviano ndërsa eksportet e gazit janë ulur.

Tensionet janë rritur në Bolivi përpara zgjedhjeve të përgjithshme në 2025. Ish-presidenti majtist Evo Morales planifikon të kandidojë kundër ish-aleatit Arce, duke krijuar një përçarje të madhe në partinë socialiste në pushtet dhe pasiguri më të gjerë politike.

Shumë nuk duan një rikthim të Morales, i cili qeverisi nga vitet 2006-2019 kur u rrëzua mes protestave të përhapura dhe u zëvendësua nga një qeveri e përkohshme konservatore. Arce më pas fitoi zgjedhjet në 2020.

Zuniga tha kohët e fundit se Morales nuk duhet të jetë në gjendje të kthehet si president dhe e kërcënoi se do ta bllokonte nëse do të përpiqej, gjë që bëri që Arce të largonte Zunigën nga posti i tij.