Ka dështuar seanca e jashtëzakonshme e thirrur nga Lëvizja Vetëvendosje, ku ishte paraparë votimi i komisioneve parlamentare, disa marrëveshje ndërkombëtare dhe Buxheti 2026. Kjo pasi nuk është siguruar kuorumi i nevojshëm për mbarëvajtjen e saj.
Kryekuvendari Dimal Basha e ka mbyllur seancën e sotme për buxhetin dhe marrëveshjet ndërkombëtare të cilat nuk arritën të miratohen.
Ai tha para deputetëve të Lëvizjes Vetëvendosje që ishin të vetmit të pranishëm në seancë, se ajo mbetet e hapur dhe nëse sipas tij ka ndonjë ndryshim të qëndrimeve të partive politike rreth kësaj çështjeje.
“Iu bëj thirrje të gjitha subjekteve politike, që t’i bashkëngjiten deputetëve, që të mblidhemi dhe t’i kalojmë këto ligje që janë me rëndësi për qytetatët e Republikës”, tha ai.
Në fjalën e tij, ai iu ka bërë thirrjeve partive të ish-opozitës që të reflektojnë dhe të marrin pjesë në këtë seancë.
“Në rast se kemi ndryshim të qëndrimeve, iu bëj thirrje të gjitha subjekteve politike dhe deputetëve që të mblidhemi dhe t’i kalojmë këto ligje që janë jetike për Kosovën”, tha Basha.
Kryeministri në detyrë, Albin Kurti, u ka bërë thirrje deputetëve të të gjitha partive të shkojnë në Kuvend për të votuar për marrëveshjet ndërkombëtare dhe buxhetin vjetor.
Kurti tha se Kosova “do t’i humbë mbi 200 milionë euro pakthyeshëm”, nëse nuk ratifikohen sot marrëveshjet me Bashkimin Evropian për Planin e Rritjes dhe ato me Bankën Botërore.
Ai tha se do të humbin “88 milionë euro nga Plani i Rritjes dhe 120 milionë euro nga këto tri marrëveshje me Bankën Botërore”.
“Ju e dini shumë mirë, se për ratifikim të marrëveshjeve ndërkombëtare, nuk mjaftojmë ne, edhe po ta kishim Qeverinë. Por, interesi publik dhe e mira shoqërore e kërkojnë të jemi aty bashkë. U bëj thirrje të gjithë deputetëve pa dallim partie, që sot të jemi këtu në Kuvend, ku na ka sjellë populli, t’i votojmë tri marrëveshjet ndërkombëtare”, tha Kurti.
Kurse, ministri në detyrë i Financave, Hekuran Murati ka thënë sot se nëse Kuvendi nuk arrin të ratifikojë marrëveshjet ndërkombëtare atëherë do të humbin miliona euro.
Murati rikujton se për ratifikim të marrëveshjeve ndërkombëtare nevojiten 80 vota.
“Nëse Kuvendi sot nuk arrin të ratifikojë marrëveshjet ndërkombëtare, atëherë mbi 200 milionë euro humbin pakthyeshëm: 88 milionë nga plani i rritjes i BE-së, dhe mbi 120 milionë euro nga tri marrëveshjet me Bankën Botërore.
Në këtë seancë morën pjesë vetëm deputetë e Lëvizjes Vetëvendosje dhe deputetë nga komunitetet joshumicë joserbe.
Ndërkaq, i vetmi deputet nga partitë tjera të shumicës shqiptare ishte ai i PDK-së, Përparim Gruda, i cili doli në foltore disa herë.
“Kjo seancë do të mbahet në mend në historinë e Kosovës, për të cilën të gjithë ne e dimë që është e paligjshme dhe jokushtetuese”, tha Gruda.
Ai tha se nuk shkoi aty për propagandë, por për të argumentuar paligjshmërinë e seancës dhe kufizimet e një qeverie në detyrë.
Gruda u përball me ndërhyrje nga deputetë e Vetëvendosjes, të cilët i reaguan nga ulëset e tyre, përfshirë edhe nënkryetaren e Kuvendit, Albulena Haxhiu.
Në pika të rendit të ditës të seancës së orës 11:00 ishin edhe buxhetet për tri komunat dhe RTK-në.
Tri komunat – Prishtina, Gjilani dhe Zubin Potoku – janë vonuar që të miratojnë buxhetin për vitin 2025, që do të duhej të miratohej deri më 30 shtator të vitit paraprak.
Ndërkaq, RTK-ja po përballet me probleme financiare tash e një kohë, pasi raporti vjetor i saj duhet të diskutohet nga Komisioni për buxhet i Kuvendit – që nuk është i themeluar – në mënyrë që më pas të ketë buxhet për pagat e mbi 700 punëtorëve.
Discussion about this post