Policia e Shtetit ka dështuar sërish në kapjen e kriminelëve të shumëkërkuar në vend. Dy vrasësit Talo Çela dhe Nuredin Dunami vijojnë të jenë në arrati, pas 10 operacioneve të zhvilluara në qytetin e Elbasanit për kapjen e tyre.
Burime bëjnë me dije se operacionet janë zhvilluar nga FNSH dhe RENEA, por deri më tani nuk është gjetur asnjë gjurmë apo e dhënë për fshehjen e të dy shumëkërkuarve.
Sipas informacioneve mësohet se kontrollet janë zhvilluar në qytetin e Elbasanit, në Peqin dhe në njësinë Administrative Luz të bashkisë së Kavajës.
Për shkak të dekonspirimit të aksionit policor, këto operacione janë mbajtur sekret nga autoritetet vendore.
Ndër të tjera të gjitha kontrollet në banesa ku dyshohen qe strehohen të shumë kërkuarit janë kryer me vendim Gjykate.
E shkuara e Talo Çelës
Emri i Talo Çelës është i njohur për drejtësinë kombëtare dhe ndërkombëtare, i shpallur në kërkim, pasi Gjykata për Krimet e Renda Tiranë i ka caktuar masën e sigurisë “Arrest në burg”, për veprat penale “Vrasja e punonjësit të policisë” kryer në bashkëpunim, mbetur në tentativë, “Vjedhja me armë e kryer në bashkëpunim”, në kuadër të grupit të strukturuar kriminal dhe “Vrasja me paramendim, kryer në bashkëpunim”. Sipas burimeve, emri i Çelës përkon me ngjarjen e ndodhur në datë 9 prill 2019, ndodhur në pistën e aeroportit “Nënë Tereza”, në Rinas, Tiranë, ku persona të maskuar, nën kërcënimin e armëve të zjarrit, kanë arritur të vjedhin një sasi të konsiderueshme vlerash monetare, të cilat po ngarkoheshin në avion dhe më pas gjatë shkëmbimit të zjarrit me Policinë, mbeti i vrarë njëri prej autorëve kryesorë të kësaj ngjarjeje. Gjithashtu Cela dyshohet se fshihet pas atentatit me armë zjarri të 2 vëllezërve Haxhia në Durrës. Vrasja e vëllezërve Besmir dhe Viktor Haxhia në makinën e tyre tronditi gjithë opinionin publik. Sipas të dhënave, gjithçka mund të ketë ndodhur për grabitjen e Rinasit. Vëllezërit Haxhia dyshohet se kishin dijeni për vendin ku ishin fshehur paratë dhe nuk kanë treguar. Sipas informacioneve dyshimet janë se pas grabitjes paratë janë fshehur në servisin e vëllezërve, por më pas janë zhdukur.
A.L/ gijotina.com
Discussion about this post