Një dorezë e djegur pjesërisht, e gjetur pranë një tuneli në zonën e Kombinatit, është bërë prova më e fortë që po orienton hetimet drejt identifikimit të autorit të vrasjes së biznesmenit Bujar Nasufi, i cili u ekzekutua më 12 janar pranë banesës së tij në zonën e “Pallatit me Shigjeta” në Tiranë.
Autori, që u largua me një motor dhe më pas e dogji atë për të zhdukur gjurmët, kishte përdorur doreza, duke shmangur çdo gjurmë gishtash. Megjithatë, në njërën prej dorezave të mbetura në vendngjarje, hetuesit gjetën material biologjik që ka bërë të mundur përftimin e një profili të plotë ADN.
Burime nga grupi hetimor kanë konfirmuar se profili i ADN-së është dërguar për krahasim në bazën ndërkombëtare të të dhënave të Interpolit. Nëse gjendet një përputhje me ndonjë profil të skeduar më parë, autoritetet mund të kenë në dorë emrin e ekzekutorit.
Hetimet po fokusohen edhe në një pistë tjetër: dy vëllezër nga Përmeti, të skeduar për trafik droge në Spanjë dhe me të kaluar konfliktuale me Nasufin për një pronë të përfituar prej këtij të fundit. Gjykata ka dhënë leje për të krahasuar ADN-në e gjetur me atë të nënës së dyshuarve, për të përcaktuar ndonjë lidhje të mundshme familjare.
Bujar Nasufi u qëllua për vdekje ndërsa parkonte makinën, në prani të gruas. Ngjarja ka tronditur opinionin publik dhe aktualisht është një nga çështjet më të nxehta që ndjek Prokuroria e Tiranës.
Discussion about this post