Të tjera detaje janë zbuluar lidhur me operacionin “Butrinit” ku u arrestuan 3 autoret e dyshuar të grabitjes më armë të noterit Thoma Kaci, ngjarje e ndodhur në 20 tetor në lagjen nr.4, Sarandë. Oltjon Pula, 39-vjeç nga Kruja rezulton të këtë ndërruar mbiemrin në Kolonja, duke përvetësuar atë të bashkëshortes se tij.
Ai rezulton bashkëpronar në një lavazho në lagjen nr.4 të qytetit. Elis Avduli, 52-vjeç, në realitet është Mile Xhafa nga Konispoli, një ish i dënuar në Greqi me 13 vjet heqje lirinë për trafik ndërkombëtar droge. Xhafa para shumë vitesh është kapur në Igumenicë me mbi 300 kg marijuanë, por pasi kreu disa vite nga dënimi, doli me leje nga burgu grek për të mos u kthyer më. I treti Vladrias Himaj, një 34-vjeçar nga Berati por me banim në Sarandë, është një ish-punonjës i një prej supermarketeve të mëdha të qytetit.
3 të dyshuarit janë ndjekur dje nga forcat operacionale të Drejtorisë së Policisë Vlorë në bashkëpunim me forcat e Komisariatit të Policisë Sarandë. Ata po vinin ndoshta nga Tirana për në Sarandë, kur në Gjirokastër kanë mundur të humbasin nga sytë e policisë për disa minuta. Por më pas ata kanë rënë në “grackën” policore të ngritur në afërsi të Hidrocentralit “Bistrica”, ku edhe janë ndaluar.
Brenda në mjet, por edhe gjatë kontrollit të banesave, policia nuk ka gjetur asgjë të kundërligjshme edhe pse burime konfidenciale bëjnë me dije se në automjet vinte një erë karakteristike si ajo e drogës, duke hedhur dyshime për ndonjë transport të mundshëm narkotikësh me atë mjet, një “Wolskvagen Golf”. Policia sekuestroi në një prej banesave një tjetër automjet si dhe 4 aparate celulare. Para disa ditësh, policia sekuestroi në lagjen nr.4 të qytetit edhe një armë zjarri “Kallashnikov” që dyshohet se ishte hedhur nga tre të dyshuarit. Hetimet vazhdojnë intensivisht në bashkëpunim me Prokurorinë e Sarandës.
Pak më parë është paraqitur në Komisariatin e Sarandës edhe noteri Thoma Kaci i cili do i nënshtrohet procedurës “paraqitje për njohje” me tre grabitësit.
Discussion about this post