Detaje të reja janë zbuluar nga hetimet e SPAK-ut në lidhje me një skemë të dyshuar pastrimi parash, ku përfshihet Ajola Xoxa. Sipas skemës së zbërthyer nga SPAK, Xoxa i jepte blerësve para cash në mënyrë të fshehtë, të cilat më pas i riktheheshin në formë të ligjshme përmes transfertave bankare, duke krijuar kështu iluzionin e një transaksioni të rregullt.
Pas ndarjes nga jeta të të atit në shkurt të vitit 2019, Ajola trashëgoi një sërë pronash. Njëra prej tyre ishte një ambient në pronësi të shoqërisë “Botime Enciklopedike” pranë zonës së ish-21 Dhjetorit në Tiranë. Ajo ia shiti këtë ambient një librashitësi për vlerën reale prej 50 mijë eurosh, por në kontratë u deklarua një shumë trefish më e lartë, 150 mijë euro. Diferencën prej 100 mijë eurosh, Xoxa ia ka dhënë cash blerësit, i cili më pas ia ka kthyer në rrugë bankare, duke ligjëruar kështu një pagesë që nuk kishte ndodhur realisht në atë formë.
Skema nuk përfundon me këtë pronë. Ajola ishte gjithashtu trashëgimtare e një automjeti të të atit, i cili ishte blerë për 7 mijë euro. Ajo ia shiti djalit të xhaxhait të saj, Valmir Xoxa, për 23 mijë euro, më shumë se trefishi i çmimit fillestar. Valmiri jo vetëm që nuk kishte mundësi financiare për ta blerë, por edhe e rishiti automjetin disa muaj më vonë për vetëm 11 mijë euro, çka ngre dyshime të forta mbi vlerën e fryrë të transaksionit.
Një tjetër pronë e trashëguar ishte një truall pranë “Shkollës së Kuqe” në Tiranë, ku babai i saj ishte bashkëpronar. Ajola dhe nëna e saj ia shitën pjesën e tyre sërish Valmir Xoxës për shumën 140 mijë euro, edhe pse, sipas hetimeve të Prokurorisë së Posaçme, Valmiri nuk kishte kapacitet financiar për të kryer këtë blerje. Madje, për këtë truall, SPAK ka ngritur dyshime se kryetari i Bashkisë Tiranë, Erion Veliaj, ka ndërhyrë në planin vendor në mënyrë të paligjshme, për t’i dhënë zonës prioritet zhvillimi. Kjo ndërhyrje dyshohet se ka rritur vlerën e pronës së Ajola Xoxës me të paktën 350 mijë euro mbi çmimin real, duke dëmtuar interesat e qytetarëve të tjerë me prona në të njëjtën zonë.
Discussion about this post