Nikolin Marku (Lekstakaj), 42-vjeç, u ekzekutua me breshëri të shtënash në zonën e Balldre në Lezhë. Viktima merrej me blegtori në fushat e Torrovicës, ndërsa para disa vitesh ka jetuar në Britani e Madhe.
Viktima u qëllua sapo doli nga një dyqan ku kishte blerë një pije freskuese ose bidon ujë, ndërsa ndaj tij, nga një makinë në lëvizje është qëlluar me breshëri.
Dyshimet janë se në ekzekutimin e 42-vjeçarit kanë marrë pjesë 2 persona, por është qëlluar nga një armë. Nga raportimet dyshohet se autorët e dyshuar kanë qenë të maskuar, ndërsa në rolin e ekzekutorit ka qenë vetëm 1 person.
Dyshohet se viktima ka qenë nën survejim gjatë ditës së sotme, ose në ditët e fundit, në të gjitha lëvizjet që kryente, deri në momentin e ekzekutimit, pasditen e sotme.
Policia ka nisur hetimet dhe ka mbledhur dëshmitë e para lidhur me vrasjen, ndërsa Drejtori i Policisë së Lezhës tha se është ende herët për të dalë në përfundime nëse vrasja është kryer për gjakmarrje apo jo.
Në vendin ku ndodhi vrasja nuk ka kamera sigurie, por ndoshta policia mund të mbledhë pamjet përgjatë bizneseve në rrugë për të identifikuar ndoshta automjetin që është përdorur në vrasje.
Nikolin Lekstakaj është ekzekutuar fiks 3 muaj pas vrasjes së Ardian Nikulajt, biznesmenit që u vra në 19 prill në ambientet e biznesit të tij, teksa po konsumonte një kafe.
Ndoshta data 19 në ekzekutimin e Nikolin Lekstakaj dhe Ardian Nikulajt është një rastësi, por dyshimet janë se vrasjet si ajo e kryer në prill edhe kjo e sotmja kanë lidhje me gjakmarrjen.
Discussion about this post