Detaje të reja janë zbuluar nga ngjarja e rëndë në Komunën e Parisit, ku efektivi i policisë Erjon Goxhara, qëlloi me 6 plumba punonjësin e ERE-s Lorenc Kosta, pasi ky i fundit kishte lidhje jashtëmartesore me gruan e policit.
Teksa efektivi i policisë vijon të jetë në arrati, mediat kanë zbuluar detaje të reja.
Sikurse mësohet, Erjon Goxhara para se të kryente aktin e rëndë, Goxhara ka zhvilluar një takim me bashkëshorten dhe nipin e tij, L.B., ku takimi mes tyre është zhvilluar në një qendër tregtare në periferi të Tiranës, mes debateve e tensioneve të shumta.
Pranimi i tradhtisë nga bashkëshortja
Gjatë këtij takimi, në dosje thuhet se gruaja ka pranuar tradhtinë, por nuk ka pranuar që t’i kërkojë ndjesë efektivit Goxhara. Sipas saj, tradhtia ka ndodhur vetëm një herë. Të njëjtën ditë, Goxhara pasi përfundon këtë bisedë, zhvendoset pranë lagjes ku jetonte, dhe ka plagosur Lorenc Kostën. Në zonën e Komunës së Parisit në kryeqytet jetonte edhe Kosta.
Në deklarimet e dhëna para Oficerëve të Policisë Gjyqësore në prezencë të psikologut, edhe djali i çiftit, a konfirmuar konfliktet mes prindërve të tij që nga mesi i korrikut, kohë kur sipas tij, e ëma pranon dyshimet e Goxharës për lidhjen jashtë martesore me Kostën, për të cilën thotë se ka ndodhur vetëm një herë.
Arratisja
Pasi la të plagosur rëndë Kostën, efektivi telefonon djalin dhe takohet me të te rreth-rrotullimi i Shkozës.
Në dëshminë e dhënë para hetuesve, djali ka thënë se rreth orës 14:35 të 19 gushtit, pra pak pas plagosjes, ka marrë një telefonatë nga i ati, i cili i ka treguar se ka plagosur Lorenc Kostën. Të birit i ka kërkuar që të takohen te rrethi i Shkozës. Aty efektivi Goxhara ka mbërritur në këmbë, kanë marrë një taksi dhe janë nisur për në zonën e Freskut.
Sipas dëshmisë së djalit, sapo kanë mbërritur në zonën e Thesarit të Shtetit, kanë zbritur nga taksia dhe efektivi i ka thënë të birit ta ndiqte. Por në këtë moment, janë afruar dy punonjës policie civilë, të cilët ia kanë thirrur në emër efektivit Goxhara, por ky i fundit sipas dëshmisë së djalit, është larguar me vrap nëpër pallate duke thënë “më mirë vras veten sesa të kalbem në burg”.
“Rreth orës 14:35 më ka marrë në telefon babai im dhe më ka thënë se kishte plagosur Lorencin me armë. Unë e kam pyetur i revoltuar se përse e bëri. Pas kësaj telefonate më ka marrë sërish dhe më ka thënë që të dilja te rrethi i Shkozës pasi do të shkonim në zonën e Freskut. Unë kam dalë në vendin ku më tha ta prisja. Pasi babi ka ardhur te rrethi i Shkozës në këmbë, ne kemi marrë një taksi dhe jemi nisur për në zonën e Freskut.
Sapo kemi mbërritur te zona e Thesarit të Shtetit, kemi zbritur të dy nga taksia dhe shoferit të taksisë i tha të priste kurse mua më tha që ta ndiqja. Menjëherë në këtë moment sapo kemi zbritur na janë afruar 2 punonjës policie të veshur civil të cilët e kanë thirrur në emër babain tim dhe ai sapo i pa u largua me vrap mes pallateve duke u thënë këtyre personave që më mirë vras veten sesa të kalbem në burg”, ka thënë djali, dëshmi e siguruar nga Tv Klan.
10 mijë euro shpërblim për infromacione për kapjen e Goxharës
Efektivi 46-vjeçar Erjon Goxhara, vijon ende të jetë në arrati, ndërsa policia ka vendosur shpërblim shumën 10.000 euro për këdo që jep informacion që mund të çojë në kapjen e tij.
Goxhara, më herët ka qenë komandant i repartit Shqiponja ndërsa së fundi punon në Drejtorinë për Kufirin dhe Migracionin në Tiranë, pozicion të cilin e humbi pasi menjëherë pas plagosjes.
Deri më tani nuk është bërë i mundur lokalizimi i tij.
Discussion about this post