Tritoli që iu vendos shefit të Seksionit të Krimeve, Pëllumb Shpati ditën e premte, ka zbuluar kamerat në versionin “alla Big Brother” në Shkodër.
Fill pas tritolit, ekspertët e Policisë Kriminale në Shkodër nisën që të kërkojnë pamjet filmike të kamerave të sigurisë në lagjen Dobraç, ku edhe banonte Shpati. Por nuk gjetën vetëm kamerat e sigurisë të bizneseve por dhjetëra të tjera që ishin vendosur në godina, pemë dhe në shtylla tensioni.
Gjithsej, Policia gjeti 21 kamera në hyrje-daljet e lagjeve Dobraç dhe Kiras, por deri tani nuk ka mundur të zbulojë serverat me të cilat ishin lidhur për të marrë edhe të gjitha pamjet filmike që janë regjistruar. Sipas “TvKlan”, hetusit nuk përjashtojnë mundësinë që komandimi i kamerave mund të kryhej edhe nga vende jashtë Shqipërisë.
Për të zbuluar se të kujt janë kamerat e sigurisë, kush i ka vendosur dhe kë e çfarë kanë filmuar, hetuesit e Shkodrës kanë shoqëruar disa persona nga fisi Bajri dhe Lici, që përkatësisht jetojnë pikërisht në dy lagjet e lartpërmendura. Bajri në Dobraç, ndërsa Lici në Kiras. Por asnjë prej nuk e ka pranuar autorësinë e vendosjes së kamerave të sigurisë.
Operacioni do të vijojë dhe në lagje të tjera të qytetit të Shkodrës, ku ka indicie për vendosje të kamerave me qëllim grumbullimin e informacioneve nga grupet kriminale. Kjo pasi mendohet se me anë të kamerave, grupet kriminale kanë monitoruar lëvizjet dhe operacionet e saj, si dhe lëvizjet e rivalëve. Por kamerat mund të kenë kapur edhe vrasje dhe aktivitete të tjera kriminale që kanë ndodhur pikërisht në këto zona.
Discussion about this post