Detaje të reja janë zbuluar lidhur me automjetin që u gjet i djegur në zonën e Gjadrit në Lezhë.
Sipas raportimeve, automjeti rezulton i vjedhur në shtator të 2022 në Dimal. Mësohet se automjeti është Benz, markë e njëjtë me makinën që u përdor një ditë më parë në vrasjen e Nikolin Lekstakajt. Dyshimet e para janë se automjeti i gjetur i djegur i përket autorëve që kryhen vrasjen e 42-vjeçarit, pjesëtar i fisit Lekstakaj.
Ky i fundit u ekzekutua me breshëri sapo doli nga një market ku kishte blerë pije freskuese, vetëm 300 metra larg banesës së tij.
Policia nuk ka ende një version lidhur me ngjarjen e djeshme, ndërsa dyshimet janë se ajo ka ndodhur për gjakmarrje.
Njoftimi nga Policia
Informacion shtesë në lidhje me ngjarjen e ndodhur më datë 19.07.2023, në Balldre të Lezhës, ku mbeti i vrarë me armë zjarri shtetasi N.M.(L).
Në vijim të kontrolleve të kryera nga shërbimet policore në të gjithë territorin e rrethit të Lezhës me qëllim gjetjen dhe kapjen e autorëve, në fshatin Gjadër të njësisë administrative Dajç,në një parcelë arë, nga shërbimet e policisë, është gjetur i djegur plotësisht një automjet tip ‘Benz’, i cili në shtator të vitit 2022, është denoncuar i vjedhur në Dimal të rrethit Berat.
Nga këqyrja e automjetit, në brendësi të tij, janë gjetur një armë zjarri automatik dhe disa gëzhoja, të gjitha të djegura plotësisht. Arma e zjarrit e gjetur dyshohet të jetë arma që është përdorur për vrasjen e shtetasit N.M.(L). U bë sekuestrimi i tyre në cilësinë e provës materiale për tu dërguar për ekspertime.
Nën drejtimin e prokurorisë, vijojnë veprimet hetimore procedurale të thelluara, për zbardhjen dhe dokumentimin e plotë ligjor të ngjarjes, identifikimin dhe kapjen e autorit/ëve.
Discussion about this post