Një operacion me urdhër të SPAK po kryhet në Tiranë nga Policia e Shtetit. Nga raportimet mësohet se operacioni duket se është në vazhdim të atij që u pagëzua me emrin “Metamorfoza”, ku u vunë në pranga disa persona, mes të cilëve edhe biznesmenë, drejtues policie, prokurorë e tij.
Mësohet se operacioni i nisur në orët e pasdites së 20 nëntorit është rezultat i zbërthimit të aplikacionit “Sky”, ashtu sikundër ndodhi edhe me “Metamorfozën”.
Në urdhërarrestet e SPAK, hetime që janë kryer nën drejtimin e prokurorit Vladimir Mara, ndërsa mes të arrestuarve janë shefi i krimeve të Komisariatit nr 6, Dedan Gjoni, ish-nëndrejtori i Policisë së Tiranës, Erzen Breçani dhe djali i tij, ndërkohë që në urdhër-arreste ndodhet edhe emri i Ervin Matës, i njohur si biznesmen, por që emri i tij doli i përfshirë në atë që njihej si masakra në ish-Bllok gjatë përplasjes me armë me Ervis Martanajn, ku ky i fundit mbeti i plagosur, ndërsa Fabiol Gaxha humbi jetën. Gjithashtu në këtë ngjarje mbeti i plagosur edhe Eljo Hato.
Referuar operacionit të sotëm, Dedan Gjoni, është arrestuar nga kolegët e tij të Policisë teksa po hynte në stadiumin “Air Albania” për të ndjekur ndeshjen e kombëtares.
SPAK ka ngritur një seri akuzash që nga krijimi i kushteve për vrasje, përkrahje e autorit të krimit, pastrim parash, trafik droge, në kuadër të një grupi të struktuar kriminal.
Duket se SPAK ka zgjedhur një ditë të veçantë për të ekzekutuar masat e arrestit, kur gjithë vëmendja ishte te ndeshja e fundit e Grupit E, ajo mes Shqipërisë dhe Ishujve Faroe.
Discussion about this post