Ish-drejtues të degës së PD në Korçë, të cilët dhanë dorëheqjen nga kjo degë para disa muajsh, janë shprehur në mbështetje të turit të takimeve të ish-Kryeministrit Sali Berisha me anëtarësinë e kësaj partie. Deri më tani Berisha ka zhvilluar dy takime, që i ka pagëzuar me emrin “Foltorja” në Tiranë dhe Fier, ndërsa pasditen e së shtunës, ai do të jetë në Vlorë.
Pavarësisht se ende nuk është përcaktuar se kur do të mbahet takimi me demokratët në Korçë, ish-kreu i degës së PD dhe ish-deputet i kësaj partie Gjergji Papa, u shpreh për mediat se Berisha është i mirëpritur në këtë qytet.
“Unë ruaj një marrëdhënie të shkëlqyer miqësore me të. Besoj se do të vijë në Korçë dhe unë do jem prezent në takimin e tij” – ka thënë Papa.
Gjithashtu edhe Agron Azillari, i cili ka drejtuar PD në Korçë përgjatë viteve 2005 -2009, shprehet se do të marrë pjesë në takimin e liderit historik të PD , Sali Berisha, në ‘Foltore me demokratët”.
“Jam me lëvizjen e z.Berisha dhe do marr pjesë në takimin që do të organizohet në Korçë. Shkak për të dalë kundër Lulit, është fakti i vendimmarrjes duke anashkaluar rrugën institucionale, Kryesinë apo Këshillin kombëtar” – është shprehur Azillari.
Të njëjtën linjë ka mbajtur edhe ish-drejtuesi tjetër i PD në Korçë, Andrea Mano, i cili u dërhoq pas rezultatit të 25 prillit, ku tha se Basha duhet të kishte dhënë dorëheqjen.
“Mendimi im është që Basha duhet të japë dorëhqjen dhe të ikë nga posti i kryetarit” – ka thënë ai.
Pas 25 prillit, 13 anëtarë të Kryesisë së degës së PD, si dhe kreu i saj, Andrea Mano, dhanë dorëheqjen nga pozicionet e tyre.
