Aksi rrugor Vlorë-Orikum vijon të jetë bllokuar, pasi një masiv i madh dheu ka rrëshqitur duke penguar qarkullimin e automjeteve. Pas kësaj situate ka reaguar edhe prefekti Flamur Mamaj, i cili është shprehur se shkak janë bërë shirat e rrëmbyeshëm, ndërsa ende nuk dihet se nga ka ardhur masiv i madh i dheut që ka rrëshqitur.
“Siç e shikoni është për shkak të shirave të rrëmbyeshëm që ranë pasditen e sotme. Ka bërë që të ketë një rrëshqitje të jashtëzakonshme të një masivi të madh dheu, që ka bllokuar rrugën pranë Jonufrës. Jemi angazhuar për të bërë zhbllokimin. Siç duket sipërfaqja e dherave është e rrëshqitur është rreth 1 mijë metra kub dhe’ dhe nuk jemi të bindur nga ka ardhur gjithë ky masiv”, deklaroi Mamaj.
Teksa është pyetur nëse rrëshqitja mund të jetë nga By Pass, ai shprehet se nuk mund të flas në kushtet e errësirës dhe pa parë situatën konkrete.
Discussion about this post