Elseid Hysaj do të qëndrojë jashtë fushës së blertë për të paktën 1 muaj. Fati nuk i ka buzëqeshur futbollistit të kombëtares që sapo ishte kthyer si protagonist me skuadrën e Lazios.
Pas dëmtimit në ndeshjen me Kaljerin, shkodrani bëri të gjitha ekzaminimet mjekësore dhe sipas raportit të mjekëve, dëmtimi është i një shkalle të mesme. Teste mjekësore kanë zbuluar se Hysaj ka marrë një dëmtim në kofshën e majtë dhe për t’u rikuperuar duhet të paktën 40 ditë. Në dyshim mbetet prezenca e tij në ndeshjet e para kualifikuese në Kupën e Botës e aq më tepër kur përballë do të ketë gjigandët e Anglisë ne Uembli.
Një tjetër lajm i keq për trajnerin Silvinjo vjen dhe nga Arabia Saudite aty ku Mario Mitaj ka marrë një goditje dhe është dëmtuar. Një nga lojtarët e pazëvendësueshëm në formacionin e brazilianit ka pësuar një dëmtim në muskujt e poshtëm abdominal dhe aktualisht po i nënshtrohet terapive përkatëse. Lajmin e ka bërë publik vetë faqja e Al Ittihad në faqen zytare të klubit, ku mes të tjerash tregon se rikthimi i futbollistit në stërvitje do të jetë në varësi të progresit të tij.
Megjithatë siç raportohet, nuk është diçka serioze dhe një dëmtim i tillë nuk parashikohet ta lë jashtë fushës për një kohë të gjatë. Për këtë arsye trajneri Silvinjo shpreson që ta ketë gati për duelin e parë me Anglinë në datën 21 mars.
Discussion about this post