Plot 10 ditë nga sulmi ndaj autobuzit që po transportonte nxënës nga Gjakova për në Deçan, ku dy nxënës dhe shoferi i autobuzit mbetën të vrarë, autori i ngjarjes endet i lirë. Lidhur me këtë ngjarje të bujshme dhe tragjike nuk ka asnjë të arrestuar, ndonëse zyrtarët e shtetit dhe organe kompetente deklaruan se do të vepronin për kapjen e autorëve të sulmit makabër.
Ministri i Punëve të Brendshme, Xhelal Sveçla tha se të gjitha kapacitetet shtetërore janë vënë në dispozicion të zbulimit të rastit.
“Unë i bëj ultimatum vrasësit që të dorëzohet sepse për çdo ditë ai i rëndon të tjerët, ai që i ndihmon vrasësit implikohet në vepër penale. Sa më parë që dorëzohet aq më mirë për rrethin e tij dhe për qytetarët e Kosovës. Unë mund të garantoj se jemi të vendosur që të gjitha kapacitetet tona shtetërore janë në dispozicion të zbulimit të këtij rasti”, tha ai më 27 nëntor.
Ndërsa drejtori i Policisë, Samedin Mehmeti deklaroi se të dyshuar lidhur me këtë ngjarje janë më shumë se 1 person, teksa theksoi se janë duke hetuar në tri pista se si mund të ketë ndodhur rasti.
“Aktualisht jemi duke u përballur me një numër të konsiderueshëm të informacioneve rreth rastit dhe kemi sjell njësi shtesë dhe ekspertë të ndryshëm të niveleve hetimore dhe operative. “Mund të flasim për një sistem të diku 2 ose tri pistave të mundshme të hetimit. Të gjitha informacionet që jemi duke i marrë edhe nga provat materiale qojnë në këtë drejtim. Aktualisht po bisedojmë për një person me mundësi të ndërlidhjes edhe me persona të tjerë që nënkupton që mund të ketë më shumë se një të dyshuar. Deri në këtë moment nuk e kemi asnjë të dhënë asnjë provë asnjë informacion që shkon kah akti terrorist ose nga akti që lidhet me çështje religjioz”, ka thënë ai.
Por 10 ditë pas këtyre deklaratave asnjë person nuk rezulton i arrestuar si përgjegjës për këtë tragjedi, ndërkohë që familjet e viktimave kanë kërkuar vazhdimisht të veprohet nga organet hetimore.
Discussion about this post