Në urgjencën e Kukësit janë shtruar dhjetëra qytetarë, kryesisht me shqetësime virozësh dhe helmim. Dyshimet e para për këtë fluks kanë ardhur për ujin, i cili rezultonte i turbullt.
Mjeku Albert Shehu ka folur për mediat, ku thotë se nuk dihet nëse kemi të bëjmë me një virozë apo helmim ndërsa shton se deri në këto momente që po flasim janë rreth 50 persona të shtruar.
Shumica e tyre, 40 janë me bark dhe të vjella, por nuk janë përjashtuar pacientë me diarre e temperaturë. Mjeku sqaroi gjithashtu se pacientët janë nga të gjitha grupmoshat por nuk dihet shkaku i këtij fluksi.
“Ka numër të shtuar në urgjencë mund të jetë gjendje virale dhe intokacion që mund të jetë nga uji dhe perimet. Ka një fluks të shtuar 50 vizita vetëm sot disa prej të cilave me diarre e të vjella, janë shoqëruar edhe me temperaturë. Fluksin deri më tani kemi mundur ta përballojmë. Të gjitha grupmoshat, më së shumti pediatria. Është njoftuar Drejtoria e higjienës, nuk dihet nga se është shkaktuar.”
Nga ana tjetër, deri më tani raportohet se Njësia vendore e kujdesit shëndetësor në Kukës ka marrë 5 mostra në lagjen ‘Mua’ të fshatit Shtiqan për të mësuar se ç’ka ndodhur. Megjithatë derisa të dalin analizat, qytetarëve u është ndaluar konsumi i ujit që vjen në rubinetat e tyre. Një episod i ngjashëm në vendin tonë, ka ndodhur në tetor të vitit të shkuar në Krujë, ku në spital u shtruan mbi 500 banorë. Shkak ishte prezenca e amoniakut mbi normë.
Discussion about this post