Dhjetëra të vrarë dhe qindra të plagosur/ Rusët bombardojnë me granata zonën e banuar në Ukrainë

Ndërsa delegacionet e Kievit dhe Moskës janë ulur në tryezën e bisedimeve në Bjellorusi, luftimet dhe bombardimet vazhdojnë.

Dhjetëra civilë janë vrarë dhe qindra të tjerë janë plagosur gjatë bombardimeve të rënda ruse në qytetin lindor të Ukrainës, Kharkiv, bëjnë me dije zyrtarët ukrainas.

Anton Herashchenko, një këshilltar i ministrit të brendshëm të Kievit, shkroi në rrjetin social Facebook se trupat e Moskës kishin bombarduar zonat e banuara me raketa Grad, duke thënë: “Dhjetëra janë vrarë dhe qindra të tjerë janë plagosur. E gjithë bota duhet ta shohë këtë tmerr! Vdekje pushtuesit!”

Në këtë fazë nuk është e mundur të thuhet saktësisht se sa civilë janë vrarë deri më tani. Shefja e OKB-së për të Drejtat e Njeriut, Michelle Bachelet, u shpreh ditën e sotme se të paktën 102 civilë ishin vrarë, ndërsa 304 të tjerë u plagosën.

“Shumica e këtyre civilëve u vranë nga armë shpërthyese me një zonë të gjerë ndikimi, duke përfshirë granatimet nga artileria e rëndë dhe sistemet e raketave me shumë lëshime, dhe sulmet ajrore. Shifrat reale, kam frikë, janë shumë më të larta,” tha Bachlet.