Deputeti i Partisë Demokratike, Saimir Korreshi, ka reaguar në lidhje me protestën e ditës së sotme të fermerëve të Lushnjës dhe të Urës Vajgurore, të cilët u përplasën dhe me policinë.
Në një postim në facebook, Korreshi thotë se disa nga fermerët janë liruar nga komisariati i policisë së Lushnjës, ndërsa ata të Urës Vajgurore s’janë liruar dot.
“Sapo dolën fermerët e fundit nga Komisariati i policisë Lushnje, në Urën Vajgurore akoma s’kanë dal. Trishtim kur shikon këtë shtet që të vjedh votën e të jep dajakun. Fermerët e Myzeqesë por jo vetëm me anë të Sindikatës së Fermerëve por edhe me Shoqata të tjera sot kanë protestuar tek rotondo e Plugut në Lushnje.
Pak ditë me parë ata i kanë nisur disa kërkesa Kryeministrit për nevojat imediate që ka bujqësia dhe nismat që duhet të ndërmarrë qeveria. Duke rënë në veshin e shurdhër të qeverisë ata sot dolën të protestojnë pasi prej kohësh bujqësia po lëngon.
Sot dolën të protestojnë jo vetëm fermerët por edhe grumbulluesit e perimeve të trumbetuar fort nga Ministrja e Bujqësisë se shiko ç’ka bërë qeveria për ta, u ka bërë koshere të bukura por harron se s’ka më bletë brenda. E ne këtej nga anët tona i themi të rroftë kosherja” – ka thënë Korreshi.
Korreshi gjithashtu ka ironizuar edhe ministren e bujqësisë, duke thënë se flet për akademinë e na pozon me shalqi, por nuk i bëhet vonë që fermerët kanë falimentuar. Ndërkoh, shton se sot qeveria çoi policinë e shtetit për të ushtruar dhunë.
“Ministrja na flet për akademinë e na pozon me shalqi por nuk i bëhet vonë që fermerët kanë falimentuar e serat nuk po mbillen me. Nëse keni kurajën hajdeni tregojani këtyre fermerëve këtu se sa shume i doni e si e keni lulëzuar bujqësinë, po kam frik se nuk do gjeni më rrugën për në shtëpi.
Qeveria juaj hajdute ka dështuar, fermerët i keni lënë në mëshirë të fatit e i gënjeni sa herë keni zgjedhje. Grumbulluesit i përdorni për t’u marrë votat e tani s’u hapni telefonat s’keni kurrajo të vini të përballeni. Ju sot sollët gjithë policinë e shtetit e ushtruat dhunë mbi ta ndërkohë që këtë polici j’ua servirni krimit për të ruajtur parcelat e hashashit” – tha Korreshi.
Më tej Korreshi ka thënë se buxheti i qeverisë për bujqësinë është mashtrim, pasi tjetër u është premtuar në shtator e tjetër del në janar. Ai u ka bërë thirrje deputetëve pa dallim partiak që të reagojnë për këtë situatë dhe t’iu vijnë në ndihmë fermërëve.
“Sot buxheti juaj për bujqësinë është mashtrim, tjetër premtuat në shtator e tjetër na del në janar jua thashë edhe në parlament. U bëj thirrje të gjithë deputetëve të majtë e të djathtë që kanë marrë qoftë edhe një votë në këto zona të reagojnë fortë sa jemi në kohë për të ndihmuar bujqësinë se blegtoria tashmë është e falimentuar. T’i lëmë akademitë e ministres e t’u vijmë në ndihmë me paketa ekonomike fermerit” – ka thënë Korreshi.
Kujtojmë se mbi 15 persona janë shoqëruar në komisariatin e policisë së Lushnjës pas protestës së fermerëve që u zhvillua pranë kthesës së Plugut, në hyrje të qytetit. Në shenjë sensibilizimi me fermerët e arrestuar, dhjetëra të tjerë janë grumbulluar në ambientet jashtme të komisariatit, dhe presin lirimin e kolegëve të tyre. Fermerët e Myzeqesë kanë dalë në protestë duke kundërshtuar paketën e re fiskale të projektbuxhetit 2022, për vendosjen e 10% të TVSH-së për imputet bujqësore, ndërkohe që çmimi i tyre është rritur nga kriza energjetike globale.
Discussion about this post