Katër ditë nga dhunimi i gazetarit dhe administratorit të portalit “Pamfleti”, Gjergj Zefi, Komisariati nr. 3 dhe Policia e Tiranës, që po hetojnë ngjarjen, ende nuk kanë arritur të lokalizojnë dhe arrestojnë personin e vetëm të identifikuar si të dyshuar në këtë krim, Renato Bodurri nga qyteti i Elbasanit.
Renato Bodurri, rezulton të jetë babai i një fëmije 3 vjeç dhe punon si kamarier pranë një lokali të njohur në qytetin e Elbasanit.
Bodurri, vijon të qëndrojë në kërkim policor, ndërsa policia e Tiranës ka shkuar në banesën e tij në Elbasan, duke mos e gjetur në objektin e banimit.
Uniformat blu që u paraqitën në shtëpinë e tij, morën kontakt me babain dhe vëllain, e Renato Bodurrit, të cilët thanë se familjari i tyre nuk kishte asnjë lidhje me ngjarjen e rëndë.
Sipas tyre, Renato ndodhej në shtëpi në momentin kur ka ndodhur goditja e gazetarit, Gjergj Zefi. Dhe për të provuar këtë pretendim vëllai dhe babai i Renatos, kanë dorëzuar tek uniformat blu disa pamje filmike.
Por pavarësisht se Renato së bashku me familjarët e tij pretendojnë se nuk kanë asnjë lidhje me dhunën ndaj gazetarit, Bodurri, deri ditën e sotme s’ka marë asnjë iniciativë për tu dorëzuar në organet ligjzbatuese, për të sqaruar pozicionin e tij në këtë ngjarje kriminale, ku 5 persona dhunuan gazetarin Zefi.
Prova e vetme që e lidh Renato Bodurrin në sulmin fizik ndaj Gjergj Zefit, është një targë makine, që 5 personat menjëherë pas dhunës ndaj gazetarit, janë larguar. Kjo targë ka qënë e fiksuar në një automjet tip “Volsvagen”.
Por vëllai dhe babai i Renato Bodurrit, gjatë marjes në pyetje në polici, kanë pohuar se makina nuk është e tyrja, dhe se targat mund të jenë dublikuar me letër të printuar dhe ngjitur në mjetin që është përdorur në ngjarje.
Sipas tyre, makina së bashku me targat prej disa kohësh qëndron në fshat ku vijon të jetë ende dhe sot.
Për shkak të këtij përshtjellimi të krijuar gjatë kësaj faze hetimi, është kryer shpallja në kërkim policor e Renato Bodurrit. Ndërsa prokuroria e Tiranës ende nuk ka marë një vendim zyrtar për kërkimin e arrestimit të tij.
Vëllai i Renato Bodurrit është marrë në pyetje dy herë, ku policia njëherësh i ka kërkuar që të negociojë me qëllim dorëzimin e Renatos, për të dhënë sqarime.
Discussion about this post