Dhuna ndaj Petraq Milos, Berisha: Të ndëshkohet autori i krimit

Kryetari i Partisë Demokratike, Sali Berisha, reagoi pas publikimit të pamjeve të reja të dhunës ndaj Petraq Milos në kufirin me Malin e Zi.

Berisha kërkon ndëshkimin e autorit të këtij krimi.

“Pamje të reja të dhunës së banditëve me uniformë malazeze ndaj Prof. Petraq Milos në pikën kufitare.

Duke dënuar me forcën më të madhe këtë akt kriminal, ju bëj thirrje autoriteteve të Malit të Zi të ndëshkojnë me forcën e ligjit autorin e këtij krimi,” shkruan Berisha.

Pas publikimit të videos ku në doganën e Muriqanit dhunohet nga efektivët e policisë së Malit të Zi, profesori Petraq Milo, Drejtoria e Përgjithshme e Policisë së Shtetit ka kërkuar informacion në këtë pikë kalimi në lidhje me ngjarjen e ndodhur.

Nga pala malazeze është komunikuar se shtetasi shqiptar që udhëtonte me familjen, nuk ka respektuar radhën duke hyrë deri në afërsi të traut duke bllokuar rrugën. Sipas policëve malazez, i është kërkuar për t’u kthyer pas por një gjë e tillë nuk është pranuar.

Policia shqiptare ka ngritur një grup punë për bashkëpunimin me autoritetet malazeze dhe zbardhjen e ngjarjes.

Ndërkohë, autoritetet e vendit fqinj kanë pezulluar zv.drejtorin e Kufirit, Dragan Klikoovaç pas episodit të dhunës.