Presidentja e Kosovës, Vjosa Osmani, ka pritur në takim ditën e sotme Komisioneren për të Drejtat e Njeriut në Këshillin e Evropës, Dunja Mijatoviç.
Siç njofton Presidenca, në këtë takim ndër të tjera është diskutuar edhe për të drejtat e njeriut, luftimin e dhunës në familje dhe avancimin e të drejtave të grave dhe komuniteteve joshumicë.
“Në takim me Komisioneren Mijatoviç, Presidentja Osmani ka përmendur progresin e institucioneve të vendit në garantimin, mbrojtjen dhe promovimin e të drejtave të njeriut në Kosovë, duke përfshirë kornizën kushtetuese dhe ligjore, e cila është shumë e avancuar dhe plotësisht e harmonizuar me të gjitha konventat ndërkombëtare”.
Nga ana tjetër, Presidentja Osmani dhe Komisionerja Mijatoviç kanë diskutuar edhe për përpjekjet e vazhdueshme të shtetit tonë në luftimin e dhunës në familje, avancimin e të drejtave të grave dhe komuniteteve joshumicë dhe avancimin e sundimit të ligjit.
Presidentja Osmani po ashtu e ka njoftuar znj. Mijatoviç për të gjitha veprimet institucionale për fuqizimin ekonomik të grave, si dhe angazhimin që është duke u bërë në përkrahje të kategorive të margjinalizuara të shoqërisë.
Së fundmi, Osmani thuhet se ka përmendur edhe rëndësinë që Kosova të anëtarësohet në Këshillin e Evropës si hap i rëndësishëm për fuqizimin dhe avancimin e të drejtave të njeriut, duke theksuar se Kosova është mishërim i vlerave, të cilat i përfaqëson Këshilli i Evropës.
Discussion about this post