Policia e Tiranës njofton se ka nisur procedim penal për tre persona, të cilët akuzohen se kryen veprime të dhunshme gjatë ndeshjes së djeshme mes Tiranës dhe Vllaznisë, që u shoqërua me thyerje stolash, hedhje flakadanësh dhe hedhje lëndësh piroteknike në fushën e stadiumit “Air Albania”.
Sipas policisë, ka nisur procedimi penal për Astrit Frrokun, Bledar Kërniqin dhe Egzon Smajlaj, ndërkohë po vijon puna hetimore për identifikimin dhe shoqërimin e personave të tjerë që kanë ushtruar veprime të dhunshme gjatë aktivitetit sportiv.
Sfida Tirana-Vllaznia e luajtur në kuadër të javës së 16-të të Kategorisë Superiore nuk pati fitues, por prodhoi dëme dhe skandal. “Klasikja e futbollit shqiptar” u shpërfytyrua nga dhuna dhe përplasja mes tifozerive bardheblu dhe kuqeblu në stadiumin “Air Albania”. FNSH u vendos në zonat ku ishin pozicionuar tifozë kryeqytetas dhe shkodranë për të shmangur përplasje të tjera të mundshme mes tyre.
Discussion about this post