Dhuna shtazarake e Rrajëve, vjen më në fund dhe reagimi i Çuçit

Ministri i Brendshëm Bledi Çuçi më në fund ka reaguar për dhunën shtazarake që anëtarë të fisit të Rrajave kanë ushtruar ndaj kushërinjve Bilbil dhe Jashar Maja.

Sipas Çuçit, askush nuk është mbi ligjin. Ai thotë se janë arrestuar katër persona, ndërsa tre të tjerë janë shpallur në kërkim.

Ai mbron edhe punën e policisë, duke thënë se “çdo insinuatë s’ka lidhje me të vërtetën dhe me punën e Policisë së Shtetit për të çuar autorët përpara drejtësisë”.

Postimi i Çuçit:

Të rënda e të papranueshme pamjet e dhunës në Krujë. Askush nuk është mbi ligjin dhe s’mund t’u shpëtojë përgjegjësive në asnjë rrethanë.

? Policia e Shtetit ka ushtruar kontroll të imtësishëm në banesat e të dyshuarve, ka arrestuar 4 persona sot herët në mëngjes dhe po punon për kapjen sa më parë të 3 të tjerëve të përfshirë në ngjarje.

? Çdo insinuatë tjetër s’ka lidhje me të vërtetën dhe me punën e Policisë së Shtetit për të çuar autorët përpara drejtësisë.