Një i ri nga Devolli ka përfunduar në pranga pasi ka thyer masën e arrestit dhe ka dhunuar fizikisht dhe psikologjikisht partneren e tij.
Bëhet fjalë konkretisht për S. S., 19 vjeç, banues në fshatin Përparimaj, Devoll, pasi në Bilisht, ky person ka thyer vendimin e Gjykatës së Rrethit Gjyqësor Korçë, e cila kishte caktuar ndaj tij masën e sigurisë “Arrest në shtëpi” dhe ka ushtruar dhunë fizike dhe psikologjike ndaj bashkëjetueses së tij L. G.
Sipas INSTAT më shumë se gjysma e grave dhe vajzave të moshës 15-74 vjeç kanë përjetuar një ose më shumë nga pesë llojet e dhunës (dhunë nga partneri intim, dhunë në lidhje dashurie, dhunë nga jopartneri, ngacmimi seksual dhe/ose përndjekja), gjatë jetës së tyre, sipas një vrojtimi të kryer nga INSTAT në vitin 2018. Një e treta e grave dhe vajzave, rreth 37 %, kanë përjetuar dhunë gjatë 12 muajve të fundit. Lloji më i zakonshëm i dhunës është dhuna në lidhje dashurie; lloji i dytë më i zakonshëm i dhunës është dhuna nga partneri intim dhe e treta është ngacmimi seksual.
