Prokuroria e Fierit ka përfunduar hetimet paraprake dhe ka dërguar për gjykim tre shtetasit e akuzuar për përplasjen e regjistruar më 15 Prill në aksin rrugor Fier-Patos, të cilët dhunuar oficerët e Byrosë Kombëtare të Hetimit.
Bëhet fjalë për dy nipërit e biznesmenit dhe ish-kryebashkiakut të Mallakstrës, Agron Kapllanaj, shtetasit Ledjan dhe Klaudio Kapllanaj, si dhe shtetasin Gerald Kollçaku, punonjës i kompanisë ku ndodhi përplasja. Ata janë marrë të pandehur për kryerjen e veprës penale “Goditje për shkak të detyrës”, në bashkëpunim.
“Në përfundim të hetimeve mbi procedimin penal nr. 509 të vitit 2025, të kryera në bashkëpunim me policinë gjyqësore, u arrit të provohet se, më datë 15.04.2025, punonjësit e policisë pranë Forcës Operacionale në Drejtorinë e Përgjithshme të Policisë, sëbashku me oficer të Byrosë Kombëtare të Hetimit kanë shkuar në qytetin e Fierit të planizuar me shërbim, me qëllim kryerjen e veprimeve hetimore.
Gjatë ditës sipas dinamikës kanë lëvizur në vende të ndryshme në qytetin e Fierit. Po në këtë datë, punonjësit e policisë janë ndjekur dhe më pas ndaluar nga të pandehurit, ku pavarësisht prezantimit të tyre si punonjës policie, të pandehurit, në bashkëpunim me njëri-tjetrin, me veprimeve aktive kanë ushtruar dhunë fizike ndaj oficerëve të policisë, për shkak të ushtrimit të detyrës së ligjshme të tyre.
Në lidhje me ngjarjen e mësipërme, të pandehurit janë arrestuar në flagrancë dhe janë hetuar me masë sigurimi “arrest në burg” dhe “arrest në shtëpi”.” – thuhet në njoftimin e organit të akuzës.
Ngjarja ndodhi para zgjedhjeve të 11 Majit, ku hetuesit e BKH-së po kryenin veprime hetimore nën dyshimet për krime zgjedhore.
Discussion about this post