Një situatë shqetësuese është shënuar paraditen e sotme në aksin rural Hotolisht–Dragostunjë, në territorin e Bashkia Prrenjas, ku 12 pacientë të planifikuar për trajtim jetik dialize në Spitalin Rajonal te Elbasanit kanë mbetur të bllokuar për shkak të dëmtimeve të rënda në rrugë.
Sipas burimeve nga terreni, aksi rrugor është i amortizuar dhe paraqet gropa të shumta, baltë dhe segmente të dëmtuara, duke e bërë të pamundur qarkullimin normal të automjeteve. Udhëtimi drejt daljes në rrugën kombëtare, pranë Librazhd, është kthyer në një sfidë për shkak të terrenit të vështirë dhe kushteve të papërshtatshme, ndërsa pacientët kanë përjetuar ankth për shkak të vonesave.
Dializa është një procedurë jetike për personat që vuajnë nga insuficienca renale dhe çdo shtyrje e saj përbën rrezik serioz për shëndetin. Sipas informacioneve paraprake, në momentin kritik nuk është raportuar për ndërhyrje të menjëhershme nga institucionet përgjegjëse.
Në ndihmë të pacientëve kanë ndërhyrë banorët e zonës, të cilët me mjete rrethanore kanë arritur të hapin përkohësisht rrugën, duke mundësuar kalimin e automjeteve dhe duke shmangur pasoja më të rënda.
Ngjarja ka rikthyer në vëmendje problematikën e infrastrukturës rurale dhe mungesën e një plani emergjent për garantimin e qarkullimit në raste bllokimi të akseve kryesore apo alternative. Banorët kërkojnë ndërhyrje të menjëhershme për rehabilitimin e rrugës Hotolisht–Dragostunjë, si dhe të segmentit Spathar–Rruga Antike Egnatia–Dardhë–Hotolisht, për të siguruar kalueshmëri të plotë, veçanërisht në raste emergjencash shëndetësore.
Discussion about this post