Pylli me pisha në njësinë Administrative Labinot Mal në Elbasan është përfshirë nga flakë zjarri të përmasave të mëdha. Dyshohet se zjarri ka qenë i qëllimshëm, ndërsa era ka favorizuar flakët të cilat vetëm në pak minuta kanë përfshirë një sipërfaqe të madhe të pyllit me pisha.
Ndërhyrja me mjete e zjarrfikëseve në këtë zonë ku mungon terreni i përshtatshëm për mjetet ka qenë i pamundur. E vetmja ndërhyrje do të jetë ajo me forcën e krahut, çka do të thotë, me një nivel të tillë ere ky zjarr do të përhapet në një sipërfaqe edhe më të madhe, ndoshta edhe duke rrezikuar fshatrat këtu pranë.
Zjarret e qëllimshme kanë qenë kryefjala e kësaj vere, e megjithatë, të pakta kanë qenë rastet e ndëshkuara, të vëna para drejtësisë, ndërkohë pyje të tëra të Shqipërisë vazhdojnë e digjen edhe në vjeshtë dhe mbase do të digjen edhe në dimër, deri në momentin që nuk do të kemi fajtorë.
