Ankorohet pas gjashtë orës në det të hapur trageti i linjës Brindisi-Vlorë me 129 pasagjerë në bord. Mësohet se, pasagjerët kanë pritur më shume se gjashtë orë në det, ndërsa vetëm përmirësimi i kushteve atmosferike ka bërë të mundur ankorimin e tragetit.
Sipas një pasagjeri, për shkak të frikës dhe panikut ka pasur dhe persona që u ka rënë të fikët dhe nuk ka pasur asnjë mjek që të kujdeset për ta.
“Kemi pritur mbi 6 orë, për faj të një kabulli apo një teli që u shkëput. Anija pavarësisht se pati vetëm një problem të vogël iku në Sazan dhe në Karaburun. Ne s’kemi pasur asnjë njoftim zyrtar, por sipas rregullave që ishin aty ne u bazuam te ato, dhe pse ishte vërtet një udhëtim shumë i vështirë. Standardi i kushteve ishte për të dëshiruar pasi aty nuk kishte një mjek dhe kishte pasagjerë të sëmurë që u binte të fikët”, ka thënë ai.
Një pasagjer tjetër është shprehur i indinjuar se punonjësit në traget e dinin shumë mirë se deti ishte i trazuar, por sërish u nisën.
Trageti ka tentuar të ankorohet në mëngjes por ka pasur një defekt teknik, dhe ka qëndruar në mes të detit për gjashtë orë për t’u ankoruar në mesdite.
Discussion about this post